Chennai, Rymphang:
Ka Congress ka lah ban ïoh kumba 3 na ki 7 tylli ki konstitwensi ha Delhi na ka bynta ka jingïakhun ïa ka ilekshon Lok Sabha naba ka jingïakren bad ka AAP ka la poi ha ka bynta kaba khatduh, la ïathuh ka tyllong khubor.
Ka AAP, kaba bat ïa ka bor synshar ha Delhi, kan sa lah ban ïakhun ïa ka ilekshon ha ki saw tylli ki konstitwensi kiba dang sah.
Hashwa jong kane ka taïew, u Myntri Rangbah jong ka Delhi u Arvind Kejriwal u la ong ba ka jingïakren ha kaba ïadei bad ka jingïasam ïa ki konstitwensi hapdeng kine ar tylli ki seng ka la poi ha ka bynta kaba khatduh wat lada ki jingïakren ki dang sahkut hateng hateng.
Kum ban shu kdew, ka BJP ka la jop ha baroh 7 tylli ki konstitwensi ha Delhi ha u snem 2014 bad 2019. Ha u snem 2019, kane ka seng ka la ïoh jingkyrshan ha baroh 7 tylli ki konstitwensi kumba 50 per cent. Ka seng AAP ka la tyrwa sha ka seng Congress tang kawei na ki 7 tylli ki Lok Sabha konstitwensi ha Delhi, ha kaba kane ka la wanrah ka jingïapher jingmut hapdeng ar tylli ki seng synrop.
“Ha kaba ïadei bad kane ka seng Congress kam shym la ïoh ban ïakhun wat tang kawei ka konstitwensi ha Delhi, hynrei ka dang don hapdeng ka jingïatreilang, ngi la tyrwa kawei ka konstitwensi na ka bynta jong ki ha Delhi. Ngi la tyrwa sha ka seng Congress ba kan ïakhun ha kawei ka konstitwensi bad ka seng AAP ha ki 6 tylli ki konstitwensi,” la ong u MP jong ka AAP u Sandeep Pathak ha ka taïew ba la dep.
Ki jingbym ïahap jingmut hapdeng kine ar tylli ki seng ka la mih hadien ba ka AAP ka la rai ba kan sa ïakhun ha baroh 14 tylli ki Lok Sabha konstitwensi ha Punjab bad Chandigarh tang marwei.
Ka AAP ka la dep ban pynbna ruh ba kan sa ïakhun ha ki lai tylli ki konstitwensi ha Assam bad ar tylli ha Gujarat.
Kine kiei kiei baroh ki la long shi sngi hadien ba ka Congress bad ka seng Samajwadi Party ki la ai ïa ka rai kaba khatduh ha kaba ïadei bad ka jingïabhah konstitwensi jong ki ha Uttar Pradesh.
Ka Congress ka la pynbna ba kan ïakhun ha ki 17 tylli ki Lok Sabha konstitwensi, katba ki 63 tylli kiwei pat ki konstitwensi kiba dang sah ki long na ka bynta ka seng Samajwadi Party (SP) ba la ïalam da u Akhilesh Yadav bad kiwei pat ki seng ba la ïatreilang hapoh ka kynhun synrop INDIA.
