Shillong, Rymphang 23
Ka Board of Control for Cricket in India (BCCI) ha ka Sngi Palei ka la pynbna ba ïa ka lympung ïalehkai Indian Premier League yn sdang ha ka 22 tark Lber ha kaba ka lahduh jong ka aïom ba la dep ka Chennai Super Kings kan ïakhun pyrshah ïa ka Royal Challengers Bangalore ha MA Chidambaram Stadium.
Ha kane ka lympung yn pynlong ïa ki 21 sien ïakhun hapdeng ka 22 tarik u Lber haduh 7 tarik u Ïaïong. Ïa ka final jong kane ka lympung la khmih lynti ban pynlong ha ka 26 tarik u Jymmang, kaba long hadien san sngi shwa ban sdang ïa ka T20 World Cup ka ban long ha USA bad West Indies naduh ka 1 tarik Jylliew.
Ïa ki shiteng ki jingïalehkai la khmih lynti ban pynlong tad hadien ba ka Election Commission kan pynbna ïa ka tarik ilekshon, kaba la khmih lynti ban pynlong ha bnai Ïaïong bad Jymmang.
Ka jingïalehkai ha katei ka sngi sdang kan long ha ka por 8 baje mynmiet, katba kiwei pat ki jingïalehkai ki ban bud kin long ha ka por 7:30 janmiet bad kawei pat kaba kham hashwa kan long ha ka por 3:30 janmiet.
Ha ka 23 tarik kin don ar tylli ki jingïalehkai ha kaba ka Punjab Kings kan ïakhun pyrshah ïa ka Delhi Capitals ha la ïing ha kaba yn bud sa ka jingïakhun hapdeng ka Kolkata Knight Riders pyrshah ïa ka Sunrisers Hyderabad ha Eden Gardens.
Ha ka 24 tarik ka Rajasthan Royals kan ïakynduh nyngkong pyrshah ïa ka Lucknow Super Giants katba ka Mumbai Indians hapoh ka jingïalam u Hardik Pandya kan ïakhun pyrshah Gujarat Titans, kaba long ka kynhun ïalehkai kaba rim ka jong u.
Ki ar tylli ki kynhun kata ka Punjab Kinga bad ka Titans kin ïoh ban ïalehkai lynter bad kin sangeh ïalehkai tang shisien. Hadien ka jingïakhun kaba nyngkong ha la ïing, ha ka 23 tarik u Lber ka Punjab Kings kan leit sha Bengaluru ban ïakhun pyrshah ïa ka RCB ha ka 25 tarik u Lber. Ka Titans, ba la lamkhmat da u Shubman Gill hadien ka jingmih noh u Hardik ban leit ïasoh sha ka Mumbai Indians, kan leit sha Chennai ban ïakhun pyrshah ïa ka CSK ha ka 26 tarik.
Ka Delhi Capitals hapoh ka jingïalam u Feroz Shah kan ym ïoh ban ïalehkai ha la ïing naduh 22 u Lber haduh 7 tarik u Ïaïong. Baroh ki jingïalehkai kin long ha ACA-VDCA Stadium kaba ha Visakhapatnam. Na ka liang ka Delhi bad ka District Cricket Association ki la pyntip sha ki bor pynïaid ka IPL ba kim lah ban pynbiang ïa ka jaka ïalehkai hadien ba ka la ïoh ban pynlong ïa ki khadwei tylli ki jingïalehkai jong ka Women’s Premier League kynthup ïa ka final, tad haduh ka 17 tarik u Lber.
Ka Capitals, Titans bad ka RCB kin ïalehkai san na ki 14 sien. Ka KKR kan ïalehkai lai sien, katba kiwei pat ki kynhun kin ïoh ban ïalehkai mar saw sien. Ka Punjab Kings kan ïalehkai ha la ïing ha ka stadium kaba thymmai kaba ha Mullanpur kaba don shabar jong ka Chandigarh, ha ka jaka ka jingïalehkai ha la ïing kaba ha Mohali.
Katei ka sngi sdang kan long ruh ka jingwanphai biang u MS Dhoni sha ka lympung ïalehkai kriket. Te kumta la khmih lynti ba un wan poi ha Chennai ha ka taiew kaba nyngkong u Lber khnang ban sdang ïa ka jingkilanmet bad ka kynhun. Kane ka lympung kan long ruh ka jingwanphai u Hardik Pandya sha ka Mumbai Indians bad kane ka kynti kaba mynta un shimti kum u kapten hadien ki ar tylli ki aïom kiba u la don ha Titans, uba la lah ban pynurlong ïa ka nam lahduh ha ka snem kaba nyngkong. U Rishabh Pant ruh u la khmih lynti ban wanphai sha kane ka lympung hadien ba u la ngat ha ka jingjia ïatakhuh kali ha u Nohprah jong u snem 2022.
Kine ki 74 sien ïakhun kin kynthup ruh ia ki saw tylli ki jingïalehkai ‘playoff’.
