New Delhi, Rymphang:
U nongïalam jong ka seng Congress u Rahul Gandhi lyngba ka ‘phone’ u la ïakren bad u Uddhav Thackeray jong ka kynhun seng Shiv Sena (UBT) ban ïakren bad ïamir jingmut ha kaba ïadei bad ka rai ban ïasam ïa phra tylli ki konstitwensi ha Maharashtra na ka bynta ban ïakhun ïa ka ilekshon Lok Sabha.
Ka jingïakren ha kaba ïadei bad ka jingïasam ïa ki konstitwensi hapoh ka kynhun synrop INDIA ka la long kawei na ki mat ïakren ha kiba bun ki jylla haduh mynta.
Kumba la ïoh jingtip, la ong ba u Gandhi ïa uba la lam khmat ïa ka Bharat Jodo Nyay Yatra u la ‘phone’ sha u Thackeray bad ïakren bad u halor ka phang ba ïadei bad ka jingïasam ïa ki konstitwensi.
Kumba la ïathuh ka tyllong khubor la ong ba ka seng Congress ka la don jingthmu ha ka ban ïakhun na ka bynta lai tylli na ki 6 tylli ki Lok Sabha konstitwensi ha Mumbai, kiba kynthup ha Mumbai South Central, Mumbai North Central, bad Mumbai North West.
Shuh shuh kumba la ïoh jingtip, la ong ba u Uddhav Thackeray u la kwah ban ïakhun na ki 18 tylli ki Lok Sabha konstitwensi ha ka jylla, kynthup ha saw tylli kiba ha Mumbai – Mumbai South, Mumbai North West, Mumbai North East, bad Mumbai South Central.
Ka kynhun synrop Maha Vikas Aghadi, kaba kynthup ïa ka seng Shiv Sena jong u Uddhav Thackeray, ka NCP jong u Sharad Pawar bad ka seng Congress ki la don bynta ban ïakren sani bha ha kaba ïadei bad ka jingïasam ïa ki konstitwensi namar ka jingdon jong kane ka kynhun synrop ba la thaw hadien ka ilekshon Lok Sabha 2019.
