Guwahati, Rymphang:
Ki pulit ha Kokrajhar distrik jong ka Assam, ki la ïoh ban kurup ïa ka song jong u Ganja uba la kot da kumba ` 6 klur.
Kane ka jingïoh ban kurup ka la jia ha ka miet jong ka sngi Palei haba ka kynhun jong ki pulit ka la lap ïa ka trok 10 shaka kaba don ïa u Registration Number WB 23C 5242 ha Srirampur kaba don ha Gossaigaon, Kokrajhar distrik. Arngut ki briew, ïa kiba la tip kyrteng kum u Rahul Kumar bad u Ravi Kumar, ha kaba baroh arngut ki dei ki nongñiah kali na Bihar, ki la shahkem ha kaba ïadei bad ka jingdonkti ha ka jingjia.
Hadien ba la ïoh jingtip halor ka jingdon jong kane ka jingkit ïa u Ganja, ki pulit ki la pynlong ïa ka jingkhynra bad ka jingkhmih bniah ïa kane ka trok, ha kaba ki la lap ïa u Ganja ba la buhrieh ha kawei ka song jong ki bynta jong kane ka kali.
Kumba la ïathuh ki pulit jong ka Assam, la ong ba ïa une u Ganja ba la ïoh ban kurup la thmu ban kit na Guwahati sha Patna kaba don ha Bihar.
Ki pulit ki dang bteng ban pynlong ïa ka jingtohkit ha kaba ïadei bad kane ka jingjia.
