Shillong, Rymphang 23
Ka Meghalaya State Olympic Association (MSOA) ha ka Sngi Thohdieng ka la lum ïa ka jingïalang ïa ki synjuk ïalehkai ka Jylla ha Conference Hall na ka bynta ban ïakren bad ban pynkhreh ïa ki kynhun ïalehkai ki ban leit ïashim bynta ha ka 3rd North East Games 2024 ka ban long ha Nagaland.
Ïa kane ka jingïalang la pynïaid da u Bah John F. Kharshiing, Working President ka MSOA ha ka jingïadon lang u Bah Finely L. Pariat, General Secretary ka Meghalaya State Olympic Associa-tion, uba la batai bniah halor ki jingdonkam bad khamtam halor ki pro-kram jong katei ka lympung ka ban sdang naduh 18 tarik haduh 23 tarik u Lber ha Nagaland.
Katkum ka jingpynbna na ka Nagaland Olympic Association, la rai ban pynlong 16 tylli ki jingïalehkai bad ka MSOA ka la rai ban ïashim bynta lajan baroh ki jingïalehkai ha ryngkat ka jingkyrshan na ka tnad Sports and Youth Affairs jong ka Sorkar Jylla.
Ha katei ka jingïalang la don ki nongmih khmat na ki synjuk ïalehkai bapher bapher kiba ka MSOA ka la khot ki ban ïashim bynta sha katei ka North East Games bad la shim katto katne ki rai halor katei ka jingpynkhreh.
Na ka liang ki nongpynïaid ka MSOA ki la pyntip ba kin dangap ban kut shwa ka Dorbar Mang Tangka ban ïoh ïakren bad ki bor ba dei khmih ïa ka tnat Sports and Youth Affairs ban pan ïa ka jingkyrshan halor ka mang tyngka na ka bynta ban phah ïa ki nongïalehkai ka Jylla sha ka 3rd NEOG ka ban long naduh 18 tarik haduh 23 tarik u Lber Nagaland.
