Shillong, Rymphang 23
U MLA ka Nongpoh Constituency u Bah Mayralborn Syiem u la ai khublei ïa ka Sorkar Jylla halor ka jingmang pisa na ka bynta ban tei ïa ka madan phlang plastik ha ka shnong Umbuda kaba don ha Nongpoh, Ri Bhoi District.
Haba ïashim bynta ha ka jingïatai ïa ka mang tyngka ha ka sngi Thohdieng ha ka Dorbar Mang Tangka, u Bah Mayralborn u la pynpaw da kaba ong, “Nga ai khublei ïa u Myntri Rangbah ka Jylla u Conrad K. Sangma kumjuh ïa u Myntri ka tnat ïalehkai u Bah Shakliar Warjri halor ka jingmang pisa na ka bynta ban tei ïa ka madan phlang plastik (artificial turf) ha ka shnong Umbuda kaba ha Nongpoh.”
Shuh shuh u la kyntu ruh ïa ka Sorkar ba kan leh eiei halor ka jingtyrwa ban tei ïa ka stadium (standard stadium) kaba kynthup lang ïa ka synthetic athletics track lem bad ka madan phlang ba shisha (natural turf) ha Nongpoh ha ki snem ki ban wan.
