Ka jingshah kren tohmet bad jingshah pynhiar jubor jong kawei ka ‘riewniam (Sister), kaba trei ha Rilum Garo, Hills, ha Assam ha kine ki khyndiat sngi ka la pynbitar ïa kiba bun haduh ba ki la don ki MLA ka jylla kiba la ïakren halor kane ka jingjia ha Ïingdorbar Thawaiñ. Kum ban shu pynkynmaw biang, ha ka 17 tarik Rymphang, katei ka ‘riewniam kaba kyrteng ka Sister Rosemary bad kaba trei ha St. John’s Parish ha Siju, South Garo Hills, ka la dei ban leit na Dudhnoi sha Goalpara. Namarkata, ka la kiew ha kawei ka bos kaba leit na Dudhnoi sha Goalpara bad ka la dep ruh ban siew lut ïa ka pisa kaba dei ka bai shong bos. Tangba, hadien katto katne por ba ka la shong ha ka bos, u nongpynïaid bos (Conductor) lem bad kiwei pat kiba la don lang ha ka bos, ki la sdang ban kren tohmet ïa katei ka ‘riewniam halor ka rukom riam bad ka jingngeit ka jong ka. Hadien katto katne por, la pynsangeh ïa ka bos ha kawei ka jaka ba kynjah, bad la phah hiar jubor ïa kata ka ‘riewniam na ka bos.
Donbok ba ki la don noh ki katto katne kiwei pat kiba la ïarap ïa katei ka ‘riewniam ban shong da kawei pat ka bos ban leit sha Goalpara. Hynrei katei ka jingjia ka la ktah jur ïa ka jingmut jingpyrkhat jong ka Sister Rosemary kum ka ‘riew kynthei bad ka ‘riewniam. Katei ka jingjia ka la pynlyngngoh ruh ïa kiba bun namar ha ki por kiba mynshwa, ngim ju ïohsngew ba kiba kum kitei ki wan jia ha ki ‘riewniam ha Assam. Ki nongshong shnong jong ka Assam ki sakhi ïa ka jingdon ki ‘riewniam bapher-bapher la ki dei ha ki Parish ne ki skul ne ki kolej. Ki sngewthuh ïa ka kam kaba ki trei. Hynrei ym ju ïohsngew ba kin don pat kiba shong ba sah ha Assam ki ban leh tohmet ïa ki ‘riewniam.
Ka shonghok ba ka Sister Rosemary kan don hapdeng ka jingshah ktah jur ha ka jingmut jingpyrkhat. Lada dei ma ngi ha ka jaka jong ka ruh, ngin sngew kumjuh. Ngim lah ban shah peit shiliang khmat ne shah leh tohmet tang namar ka jingngeit kaba ngi bud ne ka kam kaba ki trei ne na ka jaka kaba ngi wan. Tangba ki don pat ki ‘riew shitkhlieh ki bym lah satia ban peit ne pdiang ïa kiwei ki bym long lang kum ma ki. Kumno ngin ïa long lang kumjuh? Bad balei ka long kaba donkam ban ïa long kumjuh? Ka Ri India ka khlaiñ namar ka jingbun jong ki jingïapher – jaitbynriew, niam, jingngeit, rukom im bad kumta ter-ter. Ngim tlot namar ki jingïapher. Ngi ïai neh kumne haduh katne namar ngi dang lah ban ïa burom markylliang wat hapdeng jong kita ki jingïapher. Hynrei lada don pat ki ‘riew shitkhlieh kiba pyrshang ban pynthud, ngi hap ban ïa mih shakhmat ban ïakren lane ban pynrem. Lada ngi ailad ïa kiba kum kine ki jait briew, kin sa nang kharoi shuh-shuh bad hangta ngin sa nang mad ïa ki jingeh.
Tangba ngim kynnoh than tang ïa ki ‘riew shitkhlieh namar ngi la ïohi ba ha kine ki khyndiat snem, ki don ki seng saiñpyrthei bad ki nongïalam saiñpyrthei kiba kren im-im peit-peit pyrshah ïa kiwei tang namar ba ki wan na kawei pat ka jingngeit lane ka niam. Ha ki rynsan bapher-bapher, kita ki jait briew kim salia ban kren ïa ki kyntien kiba pynmong bad pharia ïa ka imlang-sahlang. Ha ka por ilekshon lei ka kham palat. Ka jingshah kren pynmong jong ki rit paid kam dei kaba kai tang namar ka jingkwah ban ïoh ïa ki ‘vote’ na kiba kham heh paid. Hangne ngin lap ba tang namar ka ‘vote’, ki ‘riew saiñpyrthei kim salia ban kren ne leh ïa kano-kano ka kam kaba lah ban pynpait ïa ka imlang-sahlang ne buh jingma ïa ki rit paid.
Kum ki paidbah nongshong shnong pat, ngim dei ban pynsngap ne leh katkum ka jingkren jong kita ki nongpynpait shnong pynpait thaw. Ngi dei ban ïa burom markylliang. Ngim dei ban siew kylliang ïa ka jingsniew da ka basniew. Ngin hap ban teh lakam ïalade bad ym ban ngop ha ki buit poh jong ki ‘riew saiñpyrthei kiba bunkam tang ban pharia ïa ngi ki paidbah. Lada ngi ngop ha ki jingkren pharia jong ki, ngin sa nang jot arshah bad ka imlang-sahlang kan ym don hapdeng ka jingshongsuk shongsaiñ. Lada ki ngeit kat kaba ong kita ki nongpynpait shnong, ngin sa hap ban ïakhun para ma ngi ki nongshong shnong bad ngin ym don jingmap ruh wat ïa la ki jong ki para marjan bad ki paralok. Namarkata, ngin hap ban long kiba sian. Lada don mano-mano kiba kren ne leh tohmet ha ka kyrteng jong ka niam, ngi dei ban ujor sha ki bor jong ka aiñ.
