Washington, Rymphang:
Ka S.S. State Department ha ka Sngi Balang ka la pynrem jur halor ka jingkhang ia ka ‘Internet’ ha Pakistan, kynthup ruh ia ki jing pyrkhing haba iadei bad ki rynsan ‘Social Media’ ha katei ka ri. Kumta ruh ka US ka la kyntu ia ka sorkar Pakistan ba kam dei ban buh ia kum kitei ki jingpyrkhing kiba pynthut ia ki kam ki jam jong ki paid nongshong shnong jong katei ka ri bad ka dei ban weng ruh ia kum kitei ki adong ki bym donkam lada ka kwah ia ka saiñ hima- sima kaba khuid bad ba iaid beit- iaid ryntih.
Namar la ong ba ki bor pyniaid ka Pakistan ki la khang noh ia ka ‘Internet’ ha katei ka ri hadien ba pynksan ba ki don ki jingiakynad bad jingkulmar nadien ba la pynlong ia ka ilekshon paidbah hapoh Pakistan bad kumta la ong ba, khnang ban lait na kita kiei- kiei baroh, ka sorkar Pakistan ka la phah khang noh ia ka ‘Internet’ khnang ba ki paidbah kin ym lah ban ia pynshit ne phah ia ki khubor lamler katba dang ap ia ka resol jong katei ka ilekshon paidbah kaba dang shu dep long shen ha kine ki taiew ba la leit.
