Shillong, Rymphang 23
Ka Meghalaya ka la mad biang ïa ka jingshah rem kaba ar ha ka lympung ïalehkai 77th Santosh Trophy bad mynta ka la buh jingeh ban jam pat sha kawei pat ka kyrdan ïalehkai ha kane ka jingïakhun jong ka wat ba khatduh
Kane ka kynhun kaba la wan ba-ar ha u snem ba la dep, ka la shah rem noh ha ka kynhun jong shiphew ngut ki rangïalehkai ka Assam da 2-1 kol ha ka Sngi Thohdieng kaba la long ha Itanagar, Arunachal Pradesh.
Kane ka jingshah rem ar sien lynter ka la pynmih ruh ki jingkylli na kiba bun ki paidbah la ka lah ban dei ka jingbym kheiñ snep ka Sorkar Jylla ne ka dei ka jingbym don ki lympung ïalehkai.
Hadien ba katei ka kynhun hapoh ka jingïalam u Bah Khlaiñ Pyrkhat Syiemlieh ka la wan ha ka kyrdan ba-ar ha ka Santosh Trophy mynshem snem, na ka liang ka Sorkar kam shym la leh eiei na ka bynta ki rangïalehkai kumba ka la pynkup burom da ka song pisa kaba ` 4 lak tam ïa ka kynhun ki rangïalehkai phutbol (Under-18) hadien ba ka la rah ïa ka nam lahduh ha ka Khelo India Youth Games 2024 kaba la long ha Chennnai.
Ha kawei pat ka liang, ka jingkylli ka long la kane ka jingshah rem ka lah ban dei na ka daw ka jingbym don lympung ïalehkai namar ka Shillong Sports Association (SSA) kam shym la lah ban pynlong ïa ka lympung Shillong Premier League 2023-24 na ka daw ka jingbym don madan ïalehkai mynshem snem.
Kumba ka paw ha kane ka kynti ka MFA ka la lah ban sei da ka kynhun kaba khlaiñ bor nalor ki rangïalehkai kiba ïadon bynta mynshem snem, katei ka synjuk ka la pynrung ruh ïa ki rangïalehkai kiba thymmai kumjuh katto-katne ki rangïalehkai kiba la ïalehkai na ki klob shabar jylla lem bad u rang-apkol u Lionel Daryl Rymmei uba la ïohpdiang ïa ka nam Best Goalkeeper ha ka U-19 South Asian Football Federation Cup bad ruh uba la lah ban pynurlong ïa ka India ban rah ïa ka nam lahduh ha Nepal.
Haba phai sha kane ka jingïakhun jong ka Group-A, ka Assam ka la ïoh ban pynkhih jar nyngkong eh ha ka minit kaba 8 lyngba u Milan Basumatary. Kane ka dei na ka daw ka jingbakla u rangapkol ka Meghalaya, uba la shut ïa ka bol sha u Basumatary uba la don hajan kol bad u la ïoh ban shut kylla ha kaba ka la rung hi jlang.
Kane ka shi kol ka la pynkyndit bynriew ïa ki rangïalehkai ka Meghalaya na ka bynta ban ïakhun tyngeh bad hadien shiteng kynta ka la lah ban pynphai kylla lyngba ka penalty ba la shut da u Sheen Stevenson Sohktung ha ka minit kaba 32
Hashwa ban kut ka jingïalehkai jong ka kylla step, ka Assam ka la thep biang sa shi kol lyngba u Joydeep Gogoi ha ka minit kaba 45 na ka bynta ban tam da 2-1 kol.
Hadien ba la bteng ïa ka jingïakhun jong ka kylla miet ki rangïalehkai ka Meghalaya ki la ïai bteng ban ïakhun tyngeh na ka bynta ban pynphai, ha kaba ki la ïoh ïa ki kabu kiba biang, hynrei kim shym la lah ban thep kol. U Sheen u la ïoh ïa ka kabu kaba biang ban shut ïa ka bol, hynrei ka la her shabar na u diengkol bad ha kaba kut ka la mad ïa ka jingshah rem.
Ka Meghalaya ka donkam ban khur jingjop ha ki jingïakhun kiba dangsah jong kane ka group bad ha ka sngi U Blei kan ïakhun pyrshah ïa ka Kerala.
