Lahore, Rymphang:
Utei u briew uba la ithuh kum u Ameer Balaj Tipu bad uba dei ruh u runar bashyrkhei jong ka Pakistan bad uba la ju tip bad bna nam bha hapoh ka nongbah Lahore jong ka Pakistan u la shah siat ïap ha ïing ïathoh. Une runar u dei ruh u nongkhaïi uba paw bha jong ka Pakistan. Hynrei ha kane ka kynti la ong ba utei u briew u la shah siat iap ha ki briew ki bym don jingithuh katba u dang leit ban ïadon bynta ha kawei ka ïing ïathoh ha ka thaiñ Chung bad kane ka la jia ha ka 18 tarik u Rymphang (Sngi U Blei).
U Ameer Balaj Tipu, u dei u khun jong u Arif Amir bad bun na ki bahaïing- bahasem jong u, ki dei kiba don dak ha ki kam sniew bad kam runar lane ha ki kam thombor.
Katkum ka khubor na ki pulit, la ong ba ki nongsiat ha katei ka jingjia, ki la ther kuli ia u Balaj lem bad ia 2 ngut kiwei pat kiba leit ha katei ka jaka khawai shongkurim. Ha kane ka jingjia ki briew jong u Balaj ruh ki la siat bad ther kuli markylliang ha kaba u nongsiat uba synreit kuli ia u Balaj u la kyllon iap lang ha katei ka jingïather kuli lem bad ki nongbud jong u Balaj.
Na ka liang ki briew kiba don ha katei ka jaka ki la ialeh ban pynim bad pynpoi mar-mar ia u sha ka jaka sumar, hynrei la ong ba u Balaj u la khlad noh tang mar ia poi ha ka Jinnah Hospital.
Ha katei ka jingjia, la ong ba ki don bun kiba la ïa ïam pait dohnud bad kiba leit ban ïam sngewlem na ka bynta ka jingkhlad noh u Balaj.
Ki bor pynïaid jong ka Pakistan ki la phah pahara bad phah peit thuh ïa ka jinglong- jingman ha katei ka jaka bad ki la bthah ruh ban pynlong da ka jingtohkit kaba bniah ban lap ïa ka daw bad kiba don kti ha katei ka kam thombor.
Tad haduh jong ka step Sngi Nyngkong ba la pyllait ïa kane ka khubor, la ong ba ki pulit kim pat ïoh kem ne ioh bat ïano-ïano ruh haba ïadei bad kane ka jingjia.
Kumba la ju tip pyrthei hi hapoh Pakistan, la ong ba u Ameer Balaj Tipu u long uwei na ki snar ‘Gangster’ uba shyrkhei tam hapoh Lahore bad uba baroh ki sheptieng haba ki ïohsngew ïa ka kyrteng jong u.
