Shillong, Rymphang 25
Ka Barcelona ka la lah ban pynliem ïa ka Getafe da 4-0 kol ha ka lympung La Liga ha Spain bad ban kiew sha ka kyrdan ba ar ha ka miej ïakheiñ poiñ jong kane ka lympung.
Haba phai sha kane jingïalehkai, u Raphinha u la ïoh ban khyrwit ïa ka kol kaba nyngkong ha ka minit kaba 20 bad haduh ba kut ka kylla step ka Barcelona ka la tam da 1-0 kol.
Haba bteng ïa ka kylla miet, ka Barcelona ka la ïoh ban khyrwit sa lai tylli ki kol, kata ba la ïoh ban thep da u Joao Felix ha ka minit kaba 53, u Frenkie de Jong ha ka minit ba 61 bad u Fermin Lopez ha ka minit shwa ban wai noh ka jingïalehkai.
Lyngba kane ka jingjop, ka Barcelona ka la kamai 57 point na ki 26 tylli ki jingïalehkai bad kiew ha ka kyrdan kaba ar, bad ban duna da 5 point hadien jong ka Real Madrid kaba la kamai 62 point na ki 25 tylli ki jingïalehkai.
Ka Barcelona ka lah ban shah knieh noh ka-ne ka kyrdan, lada ka Girona kaba don ha ka kyrdan kaba lai kan khur jingjop, namar kumba ka long mynta ka Girona ka la kamai 56 point na ki 25 tylli ki jingïalehkai, kata ban ïalehkai duna kawei ka jingïalehkai na ka Barcelona.
Katba ka Getafe kaba la shah rem mynta ka la don ha ka kyrdan kaba shiphew, kata na ki 34 point ba ka la khur na ki 26 tylli ki jingïalehkai.
Ha kiwei pat ki jingïalehkai kane ka lympung, ka Alaves ka la ïakhaid da mar shi kol ha ka jingïakhun pyrshah ïa ka Mallorca bad ka Almeria ruh ka la ïakhaid da mar 2 kol ha ka jingïakhun pyrshah ïa ka Atletico Madrid.
