Shillong, Rymphang 25
Ka India ka donkam sa tang 152 run ban jop ïa ka jingïalehkai test kaba saw kaba dang ïaid mynta ha Ranchi bad ruh ban jop syndon ïa ka lympung ne ka nam lahduh da 3-1 ha ka jingïakhun test kaba 5 tylli.
Ka India haduh ba kut jong ka sngi ba lai, ka la kamai 40 run khlem pat hap wiket. U Rohit Sharma u la tied 24 run bad u Yashasvi Jaiswal u la tied 16 run bad ka dang neh baroh ki wiket, bad kumta la khmih lynti ba ka 152 run kan nym long satia ka thong kaba eh ban beh.
Haba phai sha ka jingïalehkai jong ka sngi kaba lai, ka India kaba la bteng ban tied ha ka pali kaba nyngkong ka la lah ban kamai tang 307 run bad hap lut baroh ki wiket. Kane ka jingkot palat 300 run ka la wan lyngba ka jinglah jong u Dhruv Chand Jurel uba la tied marwei haduh 90 run bad u Jaiswal 73 run.
Ka jinglah jong ka India ban kot sha ka 307 run, ka la pynduna ha ka jingshah tam run kaba la pynlong pat ïa ka England kaba la tied 353 run ha ka pali kaba nyngkong ba kan ïoh tam lypa da 46 run ïa ka India.
La khmih lynti ba ka England kan sa lah ban buh da ka thong kaba heh ha ka pali kaba ar ïa ka India hynrei lyngba ka jinglah ban kawang bol bha jong u Ravichandran Ashwin uba la khur 5 tylli ki wiket bad ai tang 51 run bad u Kuldeep Yadav uba la khur 4 wiket bad ai tang 22 run, la lah ban tehla-kam ïa ki nongtied ka Eng land kiba la lah ban kamai tang 145 run bad hap lut baroh ki wiket bad dei tang u Zak Crawley uba la tied marwei haduh 60 run bad u Jonny Bairstow uba la tied 30 run.
Wat la ka India ka donkam sa tang 152 run bad sah shiphew wiket, hynrei ki rangïalehkai ka England ki don ka jingkyrmen ba kin sa lah ban pynkylla bad ban khur ïa ka jingjop.
