Guwahati, Rymphang:
Kum shi bynta ban wanrah ïa ka bha ka miat bad ka shongsuk-shongsaiñ, ki MLA jong ka Naga bad Kuki-Zo na Manipur ki la pynlong da ka jingïakynduh lang ha Guwahati na ka bynta ka jingïalumlang ban ïakren halor kiba bun ki bynta. Ka jingïalang hapdeng ki MLA jong ka Naga bad Kuki-Zo na Manipur ka la long ha ka Sngi Saitjaiñ ha ka nongbah Guwahati ha Assam.
Ha kane ka jingïakynduhlang ki la don shibun ki jingïakren ha kaba ïadei bad ki kynrum-kynram kiba la mih ha ka jylla bad ka jingsngewkhia ha kaba ïadei bad ka Hills Area Committee.
Ha kane ka jingïalang la ïadonlang san ngut ki MLA Naga bad khyndai ngut ki MLA ka Kuki-Zo, ha kaba ki la ïatai sani bha ha kaba ïadei bad ka jingwanrah biang ïa ka shongsuk-shongsaiñ ha kane ka jylla Manipur.
Ki la ïakren ruh ha kaba ïadei bad ki mat halor ki jingduna jong ki jaka sam bam Ration na ka bynta ka Internally Displaced Persons (IDPs) ha Manipur, napdeng kiba bun kiwei pat. Kumba la ïoh jingtip, la ong ba ha kane ka jingïalang la ïakren ruh ha kaba ïadei bad ka rai jong ka sorkar kmie ban ker ïa ka khappud India-Myanmar bad ban mait noh ïa ka Free Movement Regime (FMR).
