Lucknow, Rymphang:
Ka General Secretary jong ka seng Congress ka Priyanka Gandhi ka la ïasnohktilang ha ka Bharat Jodo Nyaya Yatra ha ka sngi Saitjaiñ ha Moradabad kaba don ha Uttar Pradesh.
Kumba la ïathuh ka tyllong khubor kaba la wan na ka seng na Moradabad, la ong ba ka Priyanka Gandhi kala ïaid lyngba ka Fatehpur Sikri lyngba ka Amroha, Sambhal, Bulandshahr, Aligarh, Hathras, bad Agra.
Ha basdang jong kane ka taïew, ka Priyanka Gandhi ka la shah pyllait noh na Sir Gangaram Hospital kaba don ha New Delhi hadien ba ka la shah sumar na ka jingshah ktah ka kpoh bad ka jingtyrkhong jong ka met.
Ka la shah pynkit sha ka jaka ai jingsumar hadien ba la dep ban khmih bniah halor ka koit ka khiah jong ka.
Ha ka jingai jingkren ha ka por ba pynlong ïa ka Bharat Jodo Nyay Yatra, ka Priyanka Gandhi ka la ong, “Ki la don kumba 28 lak ngut ki khynnah kiba la thoh eksam na ka bynta ka kam pulit ha UP hynrei ka jingkylli ka la lait tuh…Naba ka sorkar jong ka seng BJP ka la thaw sorkar ha ka sorkar kmie bad ka sorkar jylla, ka jingkyrduh kam ka la nang jur…Katba phim pat ïohkam, phim pat ïoh ïa ka kam, ki jinglait tuh jong ki jingkylli ki la nang ïai bteng, kan ym don ka roi ka par. Ka jingkylla kan sa long tad haduh ba phin thep ïa ka vote jong phi kaba phi la ju mad.”
Ka Priyanka Gandhi hashwa ka la pynpaw ka jingsngewsih naba kam ïoh ban ïadon bynta lang ha ka Bharat Jodo Nyay Yatra ha ka 16 tarik, Rymphang namar ba ka la shitom.
“Nga la ïai ap khmih lynti ban ïoh don bynta lang ha ka BJNY ha UP, hynrei nga la sniewbok naba nga la hap ban shah sumar ha ka jaka ai jingsumar. Ngan sa ïoh noh kloi ïa ka jingkoit! Ha kaba ïadei bad kane nga pynpaw ka jingsngewnguh sha baroh ki nongïaid Yatra, ki para dkhot jong nga ha UP kiba la trei shitom na ka bynta ban pynbeit ryntih ïa ka Yatra jong u hynmen jong nga, kane baroh ka la long kaba jop naba ka la poi ha Chandauli mynta,” la ong ka Priyanka Gandhi ha ka jingthoh ba ka la dep ban phah ha ka rynsan X hashwa.
