Paris, Rymphang:
U President ka France, u Emmanuel Macron ha kane ka kynti u la pynbna ba un sa khot jingialang ia ki nongialam jong ki ri ka dewbah Europe baroh kawei ban iakren halor ka jinglong- jingman jong kane ka pyrthei mynta bad khamtam eh haba iadei bad ka thma jong ka Russia hapoh Ukraine. Ia katei ka jingialang yn pynlong ha ka nongbah Paris ha ka Sngi Nyngkong lada baroh ki kam ki iaid beit katkum ki jingthmu bad jingpynbeit.
Namar kumba la iohi hi ba ka thma Ukraine mynta ka la neh kumba 2 snem tam, bad kumta la ong ba katei ka jingialang kan iarap ban wanrah ia ki lad jingiarap na ka bynta ka Ukraine bad kumno ban leh kum shi bynta ban ai jingkyrshan ia ka Ukraine ha kine ki sngi ban wan.
Kumjuh ruh na ka liang jong ka Ukraine, u President ka Ukraine – u Volodymyr Zelensky dang ha kane ka taiew ba la dep, u la ai jingkren sha ki ri bapher bapher jong ka dewbah Europe ba kin phah jingiarap bad jingkyrshan ia ka Ukraine katba ka thma Russia ka dang neh namar u la ong ruh ba khlem ka jingkyrshan jong kitei ki para marjan ri, ka Ukraine kan sa khyllem jraiñ bad ha kajuh ka por ruh u la pynshai ba ka Ukraine ka donkam ia ki jingiarap ba kyrkieh na ki ri marjan namar wat ki kuli bad ki bom ruh ki la duna bad ki shipai ki la shong khlem tiar khlem tar ha kine ki sngi ba ka Russia ka dang pynap ban leit hiar thma jur biang ia ka Ukraine ha kano-kano ka por bym lah ban tip.
Shuh shuh ruh la ong ba ki heh ka France ki la iathuh ba u Macron u kwah ban phah ia ka khubor sha Russia ba ka Ukraine kam shym long tlot ne long marwei namar ki ri ka dewbah Europe ki don ryngkat bad ka Ukraine bad kin ym iehnoh ia ka Ukraine katba ka Russia ka dang bteng ia ka jingleit hiar thma sha Ukraine.
