Shillong, Rymphang 25
Ka Meghalaya ka la ïoh ban khur ïa ka poiñ kaba nyngkong eh ha ka lympung 77th National Football Championship jong ka Santosh Trophy 2023-24 hadien ba ka la lah ban ïakhaid noh da mar shi kol ha ka jingïa-khun pyrshah ïa ka Kerala kaba la long ha Itanagar ha ka Sngi U Blei.
Ha shwa kane, ka Meghalaya kaba don ha ka Group A, ka la dep ban mad ar tylli ki jingshah rem, kata hakhmat ka Service bad Assam hynrei ka la lah pat ban khur shi poiñ na ka jingïakhun pyrshah ïa ka Kerala. Ka Kerala lyngba kane ka jingïakhaid ka la kamai 4 .
Haba phai sha ka jingïalehkai, ka Kerala kaba dei ka lahduh jong kane ka lympung ha u snem 2022 ka la ïoh ban khyrwit kol nyngkong lyngba u Naresh Bhagyanathan tang ha ka minit kaba 4 bad watla ki rangïalehkai ka Meghalaya ki la ïakhun tyngeh bad pyrshang ban pynphai ïa kane ka shi kol hynrei haduh ba kut ka kylla step ka Kerala ka la tam lypa da 1-0 kol.
Haba bteng ïa ka kylla miet, ki rangïalehkai ka Meghalaya ki la ïakhun tyngeh bad bteng ban wad ki lad kumno ban ïoh pynkhih jar bad kane ka la wan seisoh ha ka minit kaba 77 ha kaba u Sheen Sohktung u la ïoh ban khyrwit kol bad lah ban pynïakhaid.
Ha kane ka jingïalehkai, na ka liang u Coach Bah Khlain Pyrkhat Syiemlieh u la bujli haduh 5 ngut ki rangïalehkai ha ka kynhun kaba dang shu dep shah rem ha ka Assam, ha kaba la wanrah da u Siwel Rymbai ha ka kol ha ka jaka jong u Lionel Rymmei, kiwei pat kiba la ïoh sdang ki long u Damonlang Pathaw, Dawanplielad Myrchiang, Kitboklang Pale bad u Nelson Rymbai, katba kiba la hap shong ben ki long u Lukas Syngkli, Baiai-kara Swer, Chesterpaul Lyngdoh bad u Shaiborlang Kharpan.
Ha kawei pat ka jingïalehkai jong kane ka lympung ba la long ha kane ka sngi, ka Goa ka la pynliem noh ïa ka Services da 2-1 kol.
Hadien kane ka jingïakhaid, mynta pat ka Meghalaya kan pynkhreh ban ïakhun pyrshah ïa ka Goa ka ban long ha ka 28 tarik mynta u bnai ha ka por 7 baje janmiet.
