Shillong, Rymphang 25
Ka kol kaba la ïoh ban thep da u Harry Kane ha ka minit shwa ban wai artad ka por ka la biang pura ïa ka Bayern Munich ban ïoh jingjop ha ka jingïakhun pyrshah ïa ka RB Leipzig.
Haba phai sha kane ka jingïalehkai ha ka lympung Bundesliga, ka Bayern Munich ka la lah ban pynliem noh ïa ka RB Leipzig da 2-1 kol bad ïa ki ar tylli ki kol ka Munich la ïoh ban thep da une u kapten ka England u Kane kata ha ka minit kaba 56 bad ha ka ‘injury time’ katba ïa ka shi kol ka Leipzig la thep da u Benjamin Sesko ha ka minit ba 70.
Kane ka jingjop kan dei ruh kaba nyngkong ïa ka Munich kaba la dep ban mad 3 tylli ki jingshah rem. Lyngba kane ka jingjop, ka Munich ka dang don da 8 poiñ hadien jong ka Bayern Leverkusen kaba don ha ka kyrdan kaba nyngkong.
Kumba ka long mynta, u Harry Kane u la ïoh ban khyrwit haduh 27 tylli ki kol ha ka lympung Bundesliga bad 31 tylli ki kol ha ki lympung bapher bapher jong kane ka aiom kata naduh ba u la pynïasoh sha ka Munich na ka Tottenham Hotspurs.
Haba phai sha kiwei pat ki jingïalehkai jong kane ka lympung kiba la long ha ka sngi ka sngi, ka Union Berlin ka la ïakhaid noh da mar 2 kol ha ka jingïakhun pyrshah ïa ka Heidenheim, ka B Mqladbach ka la pynliem noh da 5-2 kol ïa ka VfL Bochum, ka Werder Bremen ka la ïakhaid da mar shi kol ha ka jingïa-khun pyrshah ïa ka Darm-stadt bad ka Stuttgart ruh ka la ïakhaid da mar shi kol ha ka jingïakhun pyrshah ïa ka Koln.
