San Francisco, Rymphang:
U President ka United States, u Joe Biden ha ka Sngi Palei u la leit ban iakynduh ia ka longiing jong u Alexei Navalny hapoh ka nongbah California, ha kaba utei u nongialam ba hakhlieh duh jong ka United States u la pynbna ba ka US kan sa pynngat kyndon shuh shuh ia ka Russia bad kan pynkut ia ki jingiadei kam bapher bapher bad ka Russia namar ki jingleh palat pud jong ka ha kine ki sngi. Hynrei ka daw bah jong katei ka jingthmu jong ka US ban pynngat kyndon biang ia ka Russia namar ka jingkhlad ba kyndit jong utei u nongialam ka liang pyrshah ka Russia, ha kaba ka Russia ka la leh donbor bad buhrieh lut ia kiei- kiei kiba sha lyndet ka jingïap jong utei u nongialam.
Kumta, la ong ba ha katei ka sngi, u Biden u la ioh ban iakren markhmat bad kitei ki bahaiing- bahasem jong utei u nongialam ka liang pyrshah na Russia kiba kynthup ia ka kurim bad ka khun jong u Alexei Navalny.
Katei ka jingiakynduh ka la long hapoh kawei ka ïingbasa kaba don ha ka nongbah San Francisco. Kane ka long ruh hadien ba ka White House jong ka United States ka la ai jingkyrshan ia ka jingdawa jong ka kmie u Navalny ba dei ban pynïoh noh kloi ia ka met jong utei u nongialam ha ka kti ki bahaiing namar kumba la iohi hi mynta ki bor pyniaid ka Russia kim shym shah peit ne aiti ia ka met jong utei u nongialam ha ka kti jong ki bahaiing jong u. Kumta, la ong ba ym lah ban tip ia ka jingthmu ba kitei ki bor pyniaid ka Russia ki don sha lyndet da kaba bat wat ia ka met ba la iap jong utei u nongialam ioh lehse ki kwah ban buhrieh ia ki dak-ki shin ne ki dak mong- dak jngem ba utei u nongialam u la shah pynshitom beiñ mynta u dang don ha ka kti jongki baroh shi katta.
Namar la ong ba utei u nongialam ka liang pyrshah ka Russia, u la shah kem noh hadien ka jingpynpaw jong u ia ka jingpyrshah jur haba iadei bad ka jingleit hiar thma jong ka Russia pyrshah ia ka Ukraine, ha kaba ki bor pyniaid ka Russia naduh ki pulit bad ka Iingbishar ki la sngewdei ban pynngat kyndon ia utei u nongialam bad ka ïingbishar jong ka Russia ka la rai ban set patok ia u haduh 19 snem kynthih tang namar katei ka jingpyrshah jong u ia ki jingleh jong ka sorkar Russia.
