Mumbai, Rymphang:
U nongseng jong ka Nationalist Congress Party (NCP) u Sharad Pawar ha ka Sngi Saitjaiñ u la pyllait paidbah ïa ka shap jong ka seng kaba don ïa u briew uba put ïa ka turoi. Kane ka long kum ka dak ban ai mynsiem na ka bynta ban wanrah ïa ka jingtrei shitom bad ki jingïakhun kiba thymmai na ka bynta ka jingmyntoi jong ki briew bad ka sorkar kiba trei na ka bynta ban kyntiew ïa ki.
Khyndiat bnai hadien ba u Ajit Pawar u la mih noh na ka seng bad leit ban pynïasoh bad ka seng BJP kaba bat ïa ka jingsynshar bad ka seng Shiv Sena kaba la lamkhmat da u Eknath Shinde ha Maharashtra, ka Election Commission dang shen ka la ithuh ïa ka kynhun jong u kum ka NCP kaba shisha bad ka la pdiang ïa ka shap jong ka ha ka dur jong ka baje.
Hadien kane ka EC ka la mang ïa ka ‘Nationalist Congress Party-Sharadchandra Pawar’ kum ka kyrteng jong ka kynhun u Sharad Pawar.
Ka EC ha ka sngi Palei jong ka taïew ba la lah, ka la mang da ka shap ba don u briew uba put turoi kum ka shap jong ka seng jong u Pawar.
Ha ka jingai jingkren ha Raigad Fort hadien ba la dep ban pyllait paidbah ïa ka shap jong ka seng, u Pawar u la ong ba ka turoi kan sa wanrah jingkmen ïa ki briew kiba la ïakhun tyngeh namar ka jingkiew dor jong ki mar bad ka jingkyrduh kam.
