Shillong, Rymphang 25
Ka Shillong Lajong Foot -ball Club ka la ïai bteng ban khur jingjop ha ka lympung I-League hadien ba ka la lah ban pynliem noh ïa ka TRAU Football Club ha ka jingïalehkai kaba la long ha Kalyani Stadium ha Kolkata ha ka Sngi U Blei.
Haba phai sha kane ka jingïalehkai, ka kylla step ka la long kaba ïakhaid bha ha kaba baroh ar liang ki la ïakhun tyngeh bad sei la ki sap ki phong, hynrei haduh ba kut ym shym la don ba lah ban ïoh pynkhih jar.
Haba bteng ïa ka kylla miet, mar ïa sdang ka jingïalehkai, kata tang ha ka minit kaba 46, ka TRAU ka la ïoh ban khyrwit ïa ka kol ba nyngkong lyngba u Issahak Nuhu Seidu, kaba la ai mynsiem shi katdei eh ïa ki nongïalehkai ka TRAU hynrei ka jingbakla jong u nongap kol ka TRAU u Aaryan Anjaneya uba la kum thep bakla ïa ka bol sha la ka jong ka kol ha ka minit kaba 59, ka la pynïoh ïa ka kol pynïakhaid ïa ka Shillong Lajong.
Lyngba ka jingïoh ïa kane ka kol, ka la ai mynsiem biang ïa ki rangïalehkai kiba la ïakhun tyngeh bad dei ha ka minit kaba 72 ba ka la ïoh ïa ka kol kaba ar lyngba u Rudwere kaba la biang pura ban ïoh khur ïa ki 3 point pura.
Lyngba kane ka jingjop, ka Shillong Lajong ka la kamai 25 point na ki 15 tylli ki jingïalehkai bad ban don ha ka kyrdan kaba 5, katba ka TRAU pat ka dang don ha trai duh ka miej ïakheiñ point hadien ba ka dang ïoh tang 7 point na ki 15 tylli ki jingïalehkai.
Hadien kane ka jingjop, mynta ka Shillong Lajong FC kan pyn-khreh pat ban ïakhun pyrshah ïa ka Rajasthan Football Club ha ka 28 tarik mynta u bnai ha ka por 7 baje janmiet.
