Buenos Aires, Rymphang:
U Secretary of State jong ka United States- u Antony Blinken ha ka Sngi Thohdieng u la pynshai ba ka US ka pyrshah jur halor ka jingthmu jong ka Israel ban kurup bad synshar hi noh ia ka nongbah Gaza jong ka Palestine. Kumta ruh la ong ba ka US kam shym ai jingkyrshan ne pynshlur ia ka Israel ba kan leit hiar thma bad ban pynduh bor ia ki lehnoh Hamas khnang ba ki shipai jong ka kin ioh ban leit rung laitluid bad ioh synshar hi ia katei ka nongbah.
Katei ka jingkren jong u Blinken ka long ha kum kane ka por ba ka Israel ka thmu ban leit hiar thma jur biang ia ka Gaza khnang ba ki shipai jong ka kin ioh ban leit rung laitluid bad kin ioh ban synshar hi ia katei ka nongbah Gaza baroh kawei ynda ki lehnoh Hamas ki la khyllem.
Kumta ruh u Blinken ha katei ka sngi u la ong ba ka Gaza kam long ka khyndew ne ka jaka ban pynsan bad pynroi ia ki kam thombor jong ki lehnoh. Hynrei ka Israel ruh kam bit ban leit kam trai ne knieh wat tang khyndiat ruh u pud- u sam jong ka Palestine wat la katei ka nongbah Gaza ka la dei ka nongbah kaba la synshar hi da katei ka kynhun lehnoh Hamas hynrei ka dang dei hi pat ka bynta jong ka Palestine, bad namar kata ka Israel kam lah ban leh donbor ne iaid palat ia kata.
