Shillong, Rymphang 25
Ka Laitkor Sports Club ka la rah ïa ka nam lahduh ha ka lympung ïalehkai First Division Football League 2023-24 ba la pyn ïaid da ka Shillong Sports Association, hadien ba ka la lah ban pynliem noh ïa ka Nongrim Hills da 4-1 kol ha ka sngi Saitjaiñ ha SSA Stadium, Shillong.
Kane ka nam ka la wan hadien ba ka la ïoh ban lamkhmat ha kane ka kyrdan ïalehkai da kaba tam lai point ïa ka Nongrim Hills kaba la wan ha ka kyrdan ba ar. Haduh kaba kut ki hynriew sien ïakhun ka Laitkor ka la lah ban kamai 15 point, katba ka Nongrim Hills ka la kamai 12 point .
Namarkata, ka Laitkor bad ka Nongrim Hills ki kiew kyrdan sha ka Shillong Premier League bad kin ïoh ban ïashim ha ka aïom ban wan.
Haba phai sha kane ka jingïakhun kaba khatduh, baroh ar kynhun ki la pyrshang ban ïakhun tyngeh naduh kaba sdang. Wat la ka Laitkor ka la ïoh ïa ki katto katne ki kabu kiba baing, hynrei kam shym la lah ban pynurlong ha ka kylla step na ka daw ka jingïashan tyngeh ki rangïalehkai ‘dien ka Nongrim Hills.
Dei ha ka kylla miet ba ka Laitkor ka la ïoh ïa ka kabu kaba biang ban pyn-khih jar nyngkong lyngba u Evangel Kharkongor ha ka minit kaba 49. Kane ka kynhun ka la thep biang sa ar kol lyngba u Sondy F. Kharkongor (63) bad u Risuklang Malngiang (66) na ka bynta ban tam da 3-0 kol.
Jar la katta ka Nongrim Hills ka la shah thep haduh lai kol, hynrei ka la ïakhun tyngeh bad ka la ïoh ban pynphai kylla shi kol lyngba u Justerwell Tham ha ka minit kaba 79. Hadien shi minit ka Laitkor ka la thep biang ïa ka kol kaba saw bad kaba khatduh lyngba u Ryngkat Yanni Ryngksai na ka bynta ban khur syndon ïa ka nam lahduh.
Lyngba kane ka nam jop ka Laitkor ka la khur ïa ka song pisa kaba ` 1,00,000 (shi lak), katba ka Nongrim ka la ïoh ` 50,000 (sanphew hajar). Ïa kine khusnam la sam da ki lai ngut ki MLA kiba long ki nongshong shnong ka Nongrim Hills kiba kynthup ïa u Bah Gavin Mylliemngap, Bah Kyrmen Shylla, Bah Damanbait Lamare, kum-juh u President ka Megha -laya Football Association (MFA) Bah Hamletson Dohling, u Paiem Ainam Manik Syiem uba long u Syiem ka Hima Mylliem, ki Rangbah Shnong jong kitei ki ar tylli ki shnong kata u Bah Bantyllilang Nari na Nongrim Hills bad u Bah Arun Mawrie na Laitkor, u General Secretary ka MSOA u Bah Finely Pariat, ha ryngkat ka jingdon lang ki dkhot ka SSA bad kiwei.
Kumba ka paw ka Umphyrnai SC bad ka Mawkhar SC kiba la don ha ki kyrdan ba hatrai bad kamai mar 3 point na ki hynriew sien ïakhun, ki la shah pynhiar kyrdan noh sha ka Second Division.
