Bhubaneswar, Rymphang:
Kum shi bynta ban ïaid shakhmat ha ki jingpyntreikam ban khring ïa ki nongthep vote ha shwa ka ilekshon Lok Sabha bad Assembly, ka sorkar jong ka jylla Odisha ka la rai ban pynbiang da ka jingïarap pisa kaba shisien ai mar ` 1,000 sha palat 95.9 lak tylli ki longïing jong ka jylla bad ban pynbha shuh shuh ïa ka skhim kaba thymmai ba la tip kum ka ‘Swayam’ na ka bynta ki samla kiba trei ïa ki kam lajong kiba kynthup ha ki thaiñ nongkyndong bad thaiñ sor.
Ïa kane ka rai la shim ha ka jingïalang jong ka kynhun Cabinet jong ka jylla hapoh ka jingïalam jong u Myntri Rangbah u Naveen Patnaik ha Bhubaneswar. Ha ryngkat kane ka jingïarap pisa kaba mar ` 1,000, ki longïing kiba shah kynthup hapoh ka Public Distribution System (PDS) kin sa ïoh jingïarap da ar tylli ki pla borni ba shu rah ha kaba ym donkam siew kiba ngiam da kumba 20 kilo bad 10 kilo na ka bynta ka jingïoh ban pyndonkam manla ka sngi.
Ka jingdonkam ka pisa na ka bynta ka jingai jingïarap kan sa kot sha ka ` 959.05 klur katba ka jingdonkam halor ka jingsam ïa palat 1.91 klur tylli ki pla borni kan sa kot sha ka ` 278.69 klur. Ka jinglut ha baroh kawei ka skhim ka long ` 1,237.74 klur ka ban kynthup bad ka mang tyngka jong ka jylla, la ong u Myntri uba dei khmih ïa ka Agriculture and Farmers’ Empowerment u Ranendra Pratap Swain, u Myntri ka Food Supplies and Consumer Welfare u Atanu Sabyasachi Nayak bad u Chief Secretary u Pradeep Kumar Jena ha ka jingïakren bad ki nongthoh khubor.
Kine ki Myntri ki la ong ba hadien ba la pyntikna ban pynbiang bam sha palat 3.35 klur ngut ki briew jong ki 95.9 lak tylli ki longïing, ka sorkar jylla ka la ong ba ka jingïarap ka la dei ban nang pynbun sha kine ki nongïoh myntoi khnang ban pynsuk ha ka rukom im jong ki.
