Washington, Rymphang:
Ki shipai ka America ha ka Sngi Thohdieng ki la ioh siat pynhap ia 3 tylli ki ‘drone’ jong ki lehnoh Houthi kiba thmu leit thombor sha ka duriaw Red Sea na ka jaka ba ki don. La ong ruh ba kane ka khubor ka wan hadien ba ka US ka la ioh siat pynbthei ia 4 tylli ki drone hapoh Yemen ha ki khyndiat sngi ba la leit.
Namar la ong ba ki lehnoh Houthi na Yemen, ki la pynjur bha ia ki kam thombor mynta la bun bnai bad ki la leit thombor ia man ki jhad kiba iaid na katei ka bynta jong ka duriaw Red Sea, bad na ka liang ki shipai ka US bad UK ki la pynphai kylliang bad ther bom lang sha kitei ki jaka ba don ki lehnoh Houthi kiba long ruh ki lehnoh kiba ju ioh jingkyrshan na ka Iran.
Kumta la ong ba ha ka step phyrngab jong ka Sngi Thohdieng, ki shipai ka US ki la ioh siat pynhap ia 3 tylli ki drone jong ki lehnoh Houthi kiba leit tur shajan jong ki jhad kiba iaid lyngba ia ka Red Sea.
Kitei ki drone kim pat shym la ioh lad ban thombor ne pynhap bom ha katei ka jhad jong ka US bad kumta ruh kam shym don kano-kano ka jingjulor ia katei ka jhad ba shong ki shipai ka US. Kumjuh ruh ha ka Sngi Palei, la ong ba ki shipai US ki la ioh ban siat pynhap haduh 4 tylli ki drone bad ki la lah ruh ban siat pynbthei ia 2 tylli ki ‘namding ‘Anti-ship Cruise Missile’ ba la ther da kitei ki lehnoh sha katei ka jhad jong ka US ha Red Sea.
Hynrei la ong ba watla ka US bad UK ki la ialeh ban tehlakam ia ka jingjur ki kam thombor jong kitei ki lehnoh hynrei kitei ki lehnoh pat la i-kumba kim pynsngap bad ki salia ia ka jingmaham jong ka USbad UK.
