Imphal, Rymphang:
U Chief Justice jong ka High Court ha Manipur, u Siddharth Mridul, bad ka tnat shipai Indian Army ha ka sngi Palei ki la ai ka jingïarap bad ka jingkyrshan sha kiba bun ki briew kiba la shah ktah jur na ka jingmih ki jingïakynad ba la jia ha Kangpokpi distrik jong ka Assam, kaba dei ka jaka ba kham bun ka jaitbynriew Kuki-Zo ki ban shong shnong, la ïathuh ki heh shipai.
U Siddharth Mridul u la leit jngoh ïa lai tylli ki jaka sah jong kine ki lanot kiba don ha L. Lhangnomphai, Motbung High School, bad Damdei Taloulong ha Kangpokpi distrik ha kaba u la ïakren ruh bad kine ki briew ki bym don jaka shong jaka sah shuh.
U Chief Justice u la pynbiang ïa ki jingdonkam kiba kynthup ïa ki tiar ïalehkai Sport bad ki jingbam thiang sha ki khynnah.
Ha ka jingïakren bad ki nongthoh khubor, u Chief Justice u la ong ba u la ïai khmih bniah borabor ha kaba ïadei bad ka jingpynïoh ïa ka hok jong kine ki briew ki bym don jaka shong jaka sah shuh ha kiwei pat ki jaka sah ba shipor ha kaba kine ki briew ki la ïai ap khmih lynti ban ïoh jingïarap na ki kynhun ba dei khmih ïa ki aiñ ki kanun.
Katba u Chief Justice u dang ai ka jingïarap sha kine ki lai tylli ki jaka sah ba shipor, ki shipai ka tnat Indian Army ruh ki la kner kti ban ai jingïarap sha ki nongshong shnong kiba ha Semol bad Samusung kiba don ha kajuh ka distrik ha ka sngi Palei.
Ka jingsan jingïarap jong kane ka tnat shipai ka long halor ka jingthmu ban ai jingïarap sha kine ki lanot ban nangpynkhlaiñ shuh shuh ha ka ban pynthymmai ïa ki jingtreikam jong ki kor ki bor ha ka ban pynkhlaiñ ïa ki rukom pyntreikam ban ai jingmyntoi sha baroh.
Kane ka jingpyntreikam ka long ban ïarap ïa palat 350 ngut ki nongshong shnong jong kine ki shnong, la ong ka jingthoh kaba la wan na ka tnat ïada ri.
Ka jingpynbiang ïa ki Solar Lantern kan sa ai jingmyntoi sha ki khynnah pule kiba sah ha kine ki shnong kiba jngai na sor bad ïarap ïa ki ha kaba ïadei bad ki jingpule khamtam ha ka por ba ki don eksam.
Ka Indian Army lyngba kane ka jingpyntreikam ka la wanrah ka jingkylla ha kane ka thaiñ kaba la shah ktah jur, la bynrap shuh shuh ka jingthoh.
