Bhubaneswar, Rymphang
U nongpynïaid ïa ki kam ba ïadei bad ka ilekshon na ka BJP ha Odisha u Vijaypal Singh Tomar u la pynshisha da kaba ong ba ka seng kan sa jop ha ki 16 tylli ki Lok Sabha konstitwensi bad palat 80 tylli ki Assembly konstitwensi ha ki ilekshon ban wan bad ban thaw sorkar ha ka jylla.
Hadien ka jingkhmih bniah ha kaba ïadei bad ki jingpynlong ïa kiba bun ki prokram da ka seng hashwa ban pynlong ïa kine ki ilekshon jong ka Assembly bad Lok Sabha ha ryngkat ka jingdonlang ki nongïarap ïa kine ki kam kiba kynthup ïa ka Lata Usendi, u Tomar u la ong, “Ka Odisha kan sa don ïa ka sorkar ha ka jylla bad kaba hap hapoh ka jingpynïaid jong ka sorkar kmie ha kane ka por naba ngi la don ka jingkyrmen ba ka BJP kan sa jop ha palat 80 tylli ki konstitwensi ha ka Assembly.”
“Ka jingpaw khmat jong ka seng ka la sdang ban paw ha ka jylla ha kaba ka la kiew da palat 80 80 per cent ka jingai jingkyrshan ïa u Myntri Rangbahduh u Narendra Modi. Ka seng BJP kan sa jop ha ki 16 tylli na ki 21 tylli ki Lok Sabha konstitwensi,” u la ong.
U Tomar u la kren shai da kaba ong ba ki jingwanrah ïa kiba bun ki prokram ha ka jylla kan sa khring ïa kiba bun ki nongthep vote bad nangne ka jingkyrshan jong ki paidbah kan sa kiew da palat 50 per cent ha kine ki ilekshon ban wan.
U Tomar bad u Usendi ki la pynlong la ki jong ki jingïalang bad ki la kwah ban tip na ki nongïalam jong ka jylla shaphang ki rukom pyntreikam ki ban lah ban pynïohnong ha ka jingpyntreikam kumba la rai ha ka jingïalang kaba ar sngi jong ki nongkitkam jong ka seng ha New Delhi.
