Noida, Rymphang:
Ki pulit ki dang bteng ban pynlong ïa ka jingleit khynra sha kylleng ki jaka khnang ba kin ïoh kem lut ïa ki briew kiba la leh ïa ki kam thok lyngba ka ram.
Kane ka la jia hadien ba kawei ka Call Centre thok kaba la pynngop ïa ki briew da kaba kular ban pynbiang ïa ka ram ka la shah pynpulom noh bad phra ngut ki briew kynthup kawei ka kynthei kaba pynïaid ïa kane ka kam ki la shahkem, la ïathuh ki pulit jong ka kynhun Special Task Force (STF) ha Uttar Pradesh.
Ki la ong ba ka kynhun jong kine ki runar ka la pyntreikam ïa kane ka kam ha kawei ka shlem treikam kaba ki la shim wai kaba don ha ka thaiñ ba don ki karkhana jong ka Sector 63 ha Noida ha ki hynriew bnai ba la leit bad la antad ba ka la thok bad shukor ïa palat 300 ngut ki briew da ki klur tyngka.
“Ki phra ngut kiba la shahkynnoh, ki kynthup ïa u snar nongïalam jong ka kynhun runar, ki la shahkem na Noida na ka bynta ban pynngop ïa kine ki briew halor ka jingthmu ban ai Loan sha ki da kaba ki lah ban shu Online na India Bulls Consumer Finance ha ka ban pyndonkam da ki kot sakhi thok ha kaba la phah sha ki nongshim ram lyngba ka Whatsapp,” la ong ka jingthoh ba la phah da ka kynhun STF.
Kane ka kynhun ki runar ka la shah pynpulom noh ha ka kynhun STF jong ka Lucknow hapoh ka jingtreikam jong u Additional Superintendent of Police Vishal Vikram Singh ha ka Sngi Palei.
Ka kynhun STF ka la ïoh ban kurup ïa san tylli ki Mobile Phone, 17 tylli ki ATM ne Credit Card, lai tylli ki Laptop, ar tylli ki Tablet, 13 tylli ki Pre-activated SIM Card, 13 tylli ki Accounting Register, 75 tylli ki kot sakhi thok bad ki jingbuh jingkheiñ jong palat 1 lak ngut ki nongpyndonkam ïa ka Call Centre, la ïathuh shuh shuh ki pulit.
Ki kot sakhi thok ba la ïoh ban kurup ki kynthup ïa ki ID Card ba la shon ha ka kyteng jong ka India Bulls, ki shithi ba la pdiang ban ai ram bad ki shithi ba la pyntikna ban ai ram, la ong ka jingthoh, ha kaba la bynrap shuh shuh ba kine ki nongshim ram ki la shah pynngop ha ka kyrteng jong ki jingpynrung kyrteng, ki jingsiew ha kaba ïadei bad ka jingpyntreikam, ka GST bad ka Insurance ka ban long pyrshah ïa ka Loan napdeng kiwei pat.
Ïa kine kiba la shahkem la tip kyrteng kum u snar nongïalam ha kane ka jingjia, u Chhaya Singh, Priya Shukla, Aanchal Chaudhary, Sulekha, Ankit Singh, Vijendra Pratap Singh, Archana Prajapati bad Shivani Thakur, la ïathuh ka jingthoh.
Ka la don ka jingujor ejahar ba la buh ha kaba ïadei bad ka jingjia ha ka Sector 63 Police Station kaba don ha Noida hapoh ki kyndon jong ka Indian Penal Code kiba kynthup hapoh ka kyndon 419, 420, 467, 468, 471 bad hapoh ka Information Technology Act bad ka jingtohkit ha kaba ïadei bad kane ka jingjia ka dang ïai bteng haduh mynta, la bynrap shuh shuh ka jingthoh ba la phah da ka kynhun pulit.
