New Delhi, Rymphang:
Ka jingkhlaiñ treikam nala ïing la sem ka long ka bynta kaba kongsan ha ka ban donkam ban ïada ïa ki samla na ka jingkyrni dih drok, la ong u Myntri Rangbahduh u Narendra Modi ha ka sngi U Blei.
“Na ka bynta ka jingthmu ban tei ïa ka India bad ban lait na ka jingpyndonkam drok, ka long kaba donkam eh na ka bynta ki longïing ba ki dei ban long kiba khlaiñ kum ki jaka ai jinghikai,” u la ong ha ka jingai jingkren jong u lyngba ka durkhih ha ka por ba don ka prokram ‘Ashwamedha Yagya’ ba la pynïaid da ka Gayatri Parivar.
“Haba ki dkhot jong ka longïing kim ïakynduh ne shonglang na ka bynta bun sngi, kata ka jingma ka ap bad namar kata ka daw ki longïing ki la dei ban long kiba khlaiñ khnang ban lah ban pyllait ïa ka ri na u drok,” la ong u Myntri Rangbahduh.
Ka ‘Ashwamedha Yagya’ ka la long ka prokram pynsngewthuh paidbah kaba heh bad ïada ïa ki Million ngut ki samla ba kin lait na ka jingkyrni ha ka jingdih drok bad ban lah ban tei bad ban im ka jingim kaba bha, u la ong.
U Modi u la ai jingmut ïa ka jingdonkam na ka bynta ban pynbiang ki jingai jingkyrshan sha kiba ki samla kiba la kyrni ha ka jingdih drok bad ban ïai bteng ha ka ban pynkhlaiñ ïa ka ri ba kan lah ban ïakhun pyrshah khnang ban lah ban pyllait ïa ka ri na u drok ha kaba kane ka la don bynta ban ai mynsiem bad pynsngewthuh ïa palat 110 Million ngut ki briew naduh ba la plie paidbah bad sdang pyntreikam ïa ka.
U Myntri Rangbahduh u la ong ba ka jingïohlad jong ki samla ban don bynta ha kine ki prokram la ka long ha ka ri ne ha ka pyrthei kan sa ïarap ïa ki ha ka ban lait na ka jingkyrni ha ka jingdih drok ne ïa ki jingdih pynbuaid.
“Ha ki jingïalap ban pynsngewthuh paidbah la ka long ha ka ri ne ha ki ri ka pyrthei, ka jinglah ban ïakynduh ïa kiba bun ki samla kata ka nang ïarap ïa ki ha ka ban kiar na ki kam sniew,” u la ong.
Ha ka jingai jingkren ha kaba ïadei bad ka jingkhmih bniah jong ka sorkar halor ki Sport bad ka Science, u Modi u la ong ba ka jingjop jong ka Chandrayaan Mission ka la plie lad na ka bynta ban wanrah ki jingpyntreikam na ka bynta ki buit treikam bathymmai, ha kaba kane ka la wanrah ïa ki jingkylla ha ki rukom pyntreikam jong ki samla ha ka rukom kaba dei.
Ki prokram kum ka Chandrayaan Mission ki la wanrah ki jingkylla ha ki rukom pyntreikam ha kaba ïadei bad ka jingïakhun ban aibor ïa ki samla bad ba kin lah ban trei ha ka rukom kaba dei, u Myntri Rangbahduh u la bynrap shuh shuh da kaba ong ba ka Fit India Movement bad ka Khelo India kan sa ïarap ban pynïoh mynsiem ïa ki samla bad ban pynkiar ïa ki ban ngop ha kine ki jingdih kiba ïalam bakla.
