Sa tang katto katne kynta, ka Dorbar Mang Tyngka jong ka Ïingdorbar Thawaiñ kan poi noh sha kaba kut. Ka la long ka Dorbar ka balyngkot, hynrei kaba bud nuksa na kiwei pat ki Dorbar kiba la long ha kine ki 15 snem tam. Kito ki aïom bad ki por ba ki MLA ki shong Dorbar da ki taïew bad wat haduh shi bnai ne tam, ki la kut. Ngim tip balei ki Dorbar kim long shuh kum ha ki snem 1970, 1980 bad 1990 bad wat haduh ki 2000 khlieh. Haba ngi khyllie ïa ka mynnor, ngin ïohi ba kito ki MLA ha ki snem ki bamynshwa, ki shong Dorbar da kiba bun tylli ki sngi bad don ki khep ba ka Dorbar ka wai haduh ban da miet. Sngewbynnud ba ngim ïohi shuh ïa kito ki por. Bad kin sah sa tang ha ki jingkynmaw bad ha ki jingthoh jingtar.
Na kawei ka Dorbar sha kawei pat, ngi ju khmih kino ki MLA kiba kham jam ka ktien ha Ïingdorbar bad kino kiba leh kiar wat tang ban kren shi kyntien. Ha kane ka juk na ka daw ba la shah ban ring dur khih hapoh Ïingdorbar Thawaiñ katba ka Dorbar ka dang ïaid, ym kum ha ki snem ba mynshwa, ki paidbah ki ïohi mano kita ki MLA kiba kren bad mano kiba mlien ban sngap mynthi wat hapdeng jong ka jingdon kiba bun bah ki mat ki jura ban ïathir. Teng teng i kumba ki don ki konstitwensi kiba khlem jied ïa la ki jong ki MLA ha ka ilekshon namar kita ki MLA kim ju paw haei-haei ha ki jingïakren ha Dorbar. Ki paidbah ki tip kham bha mano kita ki MLA kiba rah ïa ki mat ki jura ha Dorbar bad mano kiba sngap man-man la kumba ka jylla jong ngi ka la biang lut nadong shadong bad ym donkam shuh ban ïathir bad ka sorkar. Don napdeng ki paidbah nongthep ‘vote’ kiba bitar haba ki MLA kim kren, bad don pat ki bym sngeweiei.
Ha ka jingshisha, haba la long kat u ne ka dkhot ka Ïingdorbar Thawaiñ, la dei ban shlan ban kren halor ki jingeh jong ki paidbah la ka long ha ki konstitwensi lajong ne ha jylla salonsar. Yn ym don kiba lah ban pynkren lem da kiwei hapoh Ïingdorbar Thawaiñ namar kam don kaba kum kata ka kyndon ne ka dustur. Lada lah ban pynkren da kiwei ha ka jaka jong ki MLA kiba la shah jied, kan don jingmut aïu kata ka ilekshon bad ka jingshah jied kum u ne ka MLA? Ngi sngewrem kum ki nongshong shnong ka jylla ban ïohi ïa ki katto katne ki MLA kiba khlem pat kren naduh ba sdang ka samoi treikam jong ka Ïingdorbar Thawaiñ ha u snem 2023. La jan don shi snem ba kane ka samoi ka la ïaid, bad ka long lehnohei shisha ban peit ba ki don ki MLA kiba shu leit shongkai ha kito ki shuki remdor ha Dorbar bad ki shu ang sharum shaneng lane rkhie ïapler la kumba ki konstitwensi bad ki paidbah jong ki, ki la biang lut nadong shadong khlem da donkam shuh ban pynpaw ïa ki jingeh sha ka sorkar. Lehse kin don beit napdeng kito kiba la jied ïa kiba kum kita ki MLA kiba la sngewbabe kylla. Tangba kata ruh kam don jingmyntoi shuh namar hap ban ap haduh u snem 2028 ynda la wan ka ilekshon bathymmai.
Ha kajuh ka por, ngi ai mynsiem ïa kito ki MLA kiba ju kren na ka por sha ka por bad kumjuh ruh ïa kito ki MLA kiba dang thymmai, hynrei kiba pyrshang ban pashat jingmut lane ban takraiñ ïa ka sorkar. Ym don kiba biang lut nadong shadong, hynrei hap ban pyrshang. Kam pher lada don jingbakla hangne hangtai namar na ka liang u Lamphang u don ïa ka kamram ban pynbeit ïa kita. Ki don ki MLA ba la rangbah kiba lah ban ai jingmut lem ïa ki MLA ba dang thymmai bad ki bym pat da tip bha ïa ki kyndon jong ka jingpynïaid Dorbar. Ym dei ban don ïa ka mynsiem sarong ka bym kwah ban nang ïa kiei-kiei bathymmai lane ban kylli pyrthew haba don jingartatien. Ka jingbym kwah ban kylli pyrthew kan pynsah biej shirta.
Hynrei kam don jingmyntoi ban ïa kyntu shi kyntu ïa ki paidbah ba kin long kiba stad ban jied ïa ki MLA jong ki namar ha kaba kut, kan poi hajuh. Ngi shu ai jingkyrshan ïa kito ki MLA kiba smat ba sting ban kren bad kiba nud ban pyni ïa ki jingshisha. Lada ym don sa kiba kum kita ki MLA, ngim tip ngin poi shaei kum ka jylla. Ïa ki MLA ki bym pat kren wat tang shi kyntien haduh mynta, ai ki mat ïa rai hi kaei kaba ki sngewdei ban leh kum kita ki Nongthaw Aiñ. Ka bynta jong ngi ki paidbah ka la kut ha ka sngi ba thep ‘vote’. Ki paidbah ruh kin hap ban ïai shah ïa ka ilekshon bathymmai ha u snem 2028 wat lada ki kwah ban pynkylla noh ïa la ki jong ki MLA kiba ki la dep jied dang ha u snem ba la leit noh.
