Jowai, Rymphang 26
Ka West Jaiñtia District Sports Association ka la khot ïa ki Waheh Shnong, Secretary Shnong, Sports Secretary Affiliated Club kiba pynïasoh bad ka WJDSA ba kin pynthymmai noh ïa ka jinglong dkhot na ka bynta ka samoi treikam jong u snem 2024.
U General Secretary WJDSA u Bah Lammat O Laloo ha u kyrwoh , ula ong na ki daw bym lah kiar, ha ka jingshisha ka Dorbar Kut snem jong ka seng kan long haka 27 tarik mynta u bnai, hynrei na ka daw ka jingbym lah ban pyndep ïa ka Audit ha ka por kaba biang kumta hap ban ïaishah haduh ba la pyndep ïa ka Audit.
Ha kaba ïadei bad u snem 2024, ula ong ba ka Executive Committee kaba la long ha ka 24 tarik mynta u bnai ka la rai ban khot pynthymmai noh ïa ka jinglong dkhot na ka bynta u snem 2024. Ïa ka tarik khatduh yn pdiang ha lane shwa ka 31 tarik u Lber. Ka bai pynthymmai ka long T. 1000/-. Ki klob kiba don ha ki Division kiba shaneng na ka 3rd Division lada kim wan pynthymmai ha une u snem, kin hap ban sdang biang na ba sdang ha ki snem ban wan.
