Raipur, Rymphang:
Ki shipai ïada ri ki la ïoh ban siat ïap ïa lai ngut ki lehnoh Maoist ha ka por ba ka la don ka jingleit khynra lehnoh ha ka thaiñ Abujhmad jong ka Kanker distrik jong ka Chhattisgarh ha ka step jong ka sngi U Blei.
Ka jingïasiat kaba markylliang hapdeng ki lehnoh bad ki shipai ïada ri ka la jia ha ka por 8 mynstep ha ka bynta ba shaphang Shathie jong ka Abujhmad, hajan ki jaka lum kiba don hapoh ki bynta jong ka khlaw ka ban poi sha ka shnong Koylibeda.
Ka Abujhmad ka dei ka jaka ka bym pat da shah khmih bniah bha ha kaba la ong ba kane ka jylla ka kham heh ban ïa ka jylla Goa, bad ka la long ka jaka kaba la synshar donbor da ki lehnoh Maoist.
Ka kynhun ba la ïatreilang hadpeng ki shipai jong ka District Reserve Guards (DRG), Sashastra Seema Bal (SSB) bad Border Security Force (BSF) ki la leit sha katei ka jaka kaba don ha ki jaka khlaw hadien ba ki la ïoh jingtip shaphang ka jingdon jong ki lehnoh, la ïathuh ki heh shipai.
Ym slem hadien ba ki la poi ha katei ka jaka, ki lehnoh ki la siat sha ka kynhun jong ki shipai, bad nangne ka jingïasiat kaba markylliang ka la sdang. Ha ka por ba la don ka jingïasiat, lai ngut ki lehnoh Maoist, ki la kyllon ïap hadien ka jingshah siat, la ïathuh shuh shuh ki shipai.
“Ngi la ïoh ban kurup ïa lai tylli ki tiar siat na ki. Ka jingpyntreikam ka dang ïai bteng khnang ban lah ban ithuh ïa ki,” la ong u District Superintendent of Police jong ka Kanker distrik u Kalyan Elesela.
