Guwahati, Rymphang:
U nongïalam jong ka seng Congress bad u MP u Gaurav Gogoi u la kynnoh ba ka seng Bharatiya Janata Party (BJP) ka la pyndonkam bakla ïa ka Information Technology (IT) bad ïa ka kynhun Central Bureau of Investigation (CBI) ban pynibor pyrshah ïa ki nongïalam jong ka liang pyrshah.
Ha ka jingïakren bad ki nongthoh khubor hynnin ka sgni, u Gaurav Gogoi u la ong ba ka jingwanrah jong u MP jong ka seng Congress u Rahul Gandhi ïa ka “Bharat Jodo Nyay Yatra” ka la pynpaw ba ka la don ka jingsngew tikna ba ka la don ka kynhun ka liang pyrshah kaba khlaiñ ban ïakhun pyrshah ïa ka BJP. ” Lada don mano mano ba mihkhmat na ka liang ka liang pyrshah, kata u dei u Rahul Gandhi. Ka rukom ba ka seng BJP ka thom da ka bor ïa ka liang pyrshah da ka IT bad CBI ka la pynlong ba kiba bun na ki nongïalam jong ka liang pyrshah kim shym lah ban treikam…”
Da ka jingwanrah ïa kiba bun ki jingpynkhreh da ki seng saiñ pyrthei na ka bynta ka ilekshon Lok Sabha, ki nongïalam jong baroh ar kata jong ka seng BJP bad Congress ki la don bynta ban ïakawang ktieh kawei ïa kawei pat naba ka jingïakhun ilekshon ka la nang jan.
Ha kaba ïadei bad kane la ong ba ka jingshah ktah jur jong ka seng Congress ha Assam ka la long hadien ba u nongïalam jong ka seng u Rana Goswami u la phah ïa ka shithi iehnohkam kum u nongpynïaid jong ka seng ha Upper Assam.
Kumba la ïathuh ka tyllong khubor, la ong ba u Goswami u lah ban leit ban pynïasoh bad ka seng BJP ha kine ki khyndiat sngi ban sa wan.
