Leit phai ïing biang u nong Austria hadien ba la pyllait da ka Taliban

Doha, Rymphang:

Uwei u briew uba long u nongshong shnong jong ka Austria u la lait noh na ka kti ki bor pyniaid ka Afghanistan hadien 9 bnai ba u la shah rahbor ha ki lehnoh Taliban. Kane ka jia namar ka jing-leit rung jong utei briew sha Afghanistan wat haba ki bor pyniaid ka ri Austria ki la maham ia ki paidbah nongshong shnong ba kim dei ban leit rung ne leh shlur sha Afghanistan hadien ba ka Taliban ka la ioh knieh biang ia ka bor synshar ha Afghanistan.

Ia utei u briew la ithuh kum u Herbert Fritz bad u la don 84 snem ka rta. La ong ba utei u tymmen u la leit poi sha ka nongbah Qatari ha Doha hadien ba la pyllait noh ia u da ki Taliban.

U Fritz u la shah kem ha u bnai Jymmang hadien ba u la iaid lait ia ka jingmaham jong ka ri Austria ba ki paidbah nongshong shnong ka ri ki dei ban kiar na kaba leit rung sha Afghanistan. Ka Taliban naduh u snem 2021 ka la ioh ban knieh biang ia ka bor synshar ha katei ka ri bad kaba long ruh ka jingma ia kiwei pat ki paidbah kiba na kiwei ri ba kin leit rung ym kum ha ki por ba la leit.

Kumta ynda u Fritzi u la poi ha Doha ha katei ka sngi ruh, utei u tymmen um shym la thngad satia, pynban u la ong  ba u kheiñ ba katei ka jingshah kem jong u ka long tang namar ka jingsniew bok ha katei ka sien bad ba un sa leit ban jurip biang sha Afghanistan ha kine ki sngi ban wan.

Haba iadei bad katei ka jingshah kem jong u, utei u tymmen u la ong ba ha ka jingleit poi jong u sha katei ka ri, ki don ki briew kiba bha bad kiba pdiang sngewbha ia u bad don pat ruh kiba biej bad pyrshah ia ka jingleit jong u.

Ki bor pyniaid ka Austria ki la pyntip ba ki bor pyniaid ka ri ki lah ban phah sumar bad pynbiang shwa ia ka jingkoit- jingkhiah jong utei u tymmen hashwa ban phah noh ia u sha ka jakasah kaba u ju im barabor.

Haba iadei bad kane, la ong ba ka sorkar Taliban bad ka tnat kam bar ri jong ka Afghanistan kim shym la ai jingpynshai ne kren eiei halor kane wat haba la pan ia ka jingpynshai haba iadei bad ka jingkem bad jing pyllait jongki ia utei u tymmen uba long tang u riew paidbah bad u nongshong shnong jong ka Austria.

Katkum ka jingiathuh jong ki lad pathai khubor ka Austria, la ong ba u Fritz u la leit rung khnang sha ki bynta kiba don jingma tam bad ki bym don jingshngaiñ ia ki nongwei ha ki por ba u leit rung sha kiwei ruh ki ri naduh u snem 1980 ba u leit sha Afghanistan bad sha ki bynta Eastern jong ka Ukraine.

Hynrei ka jingleit jong u sha Afghanistan ha utei u snem ba la lah, ka long ban pynshisha ba ka jingsynshar jong ka Taliban hapoh Afghanistan kam don jingma eiei ia kiba nabar ne ia ki paidbah nongshong shnong jong ka Afghanistan ruh kumjuh.

Hynrei tang hadien khyndiat por ba u la leit poi sha Afghanistan, utei u tymmen u la shah kem noh halor ka jingshah suba bad shah pharep nongsyntiat.