Patna, Rymphang
Ha shwa ban don ka ilekshon Lok Sabha, u nongïalam jong ka seng RJD bad u Symbud Myntri barim jong ka Bihar u Tejashwi Prasad Yadav u la pyrshang ban jop ha kaba ïadei bad ka jingai jingkyrshan sha ki paidbah da kaba wanrah da ka lad kumno ma u bad ka seng jong u ki la trei shitom bha na ka bynta ban pynbiang kam pynbiang jam bad ban wanrah ïa ki lad ki lynti ha kaba ïadei bad ki lad aikam-aijam.
Nalor ba u la thalaiñ tyngeh ïa u Myntri Rangbah jong ka Bihar bad u President jong ka seng JD (U) u Nitish Kumar lyngba ki nongkynthoh jong u, u Tejashwi ruh u la kynthoh kylla ïa u Myntri Rangbahduh u Narendra Modi halor ki lad pynïoh kam-pynïoh jam ha ki jingïalang jong u ba la pynïaid ha ka por ba don ka ‘Jan Vishwas Yatra’ ha Gaya.
U la pyllait paidbah ïa ka ‘Jan Vishwas Yatra’ jong u khnang ban ïakynduh ïa kiba bun ki briew jong ka jylla ha ka 20 tarik, Rymphang.
Ha ka por ba u la ai jingkren ha ka jingïalang paidbah ha kaba la ïashim bynta da kiba bun ki samla, u Tejashwi u la ong, “Ki jingkular jong u Myntri Rangbahduh u Narendra Modi ha kaba ïadei bad ka jingpynbiang ïa 2 klur ki kam, kam shym la urlong hynrei ka jingkular jong nga ka la treikam. Ha ka por ba don ka ilekshon Assembly ha u snem 2020, nga la kular ban ai da kumba 10 lak ki kam sorkar.”
“Haba nga la ïohlad ban long kum u Symbud Myntri Rangbah, nga la ai kumba 5 lak ki kam ha ki 17 bnai. U pakhynnah jong nga u Nitish uba la phai kylla noh u la ïai bteng ïa ka kam bad ngi sa kumba katto katne por, nga la hap ban lah ban pyndep ïa ki jingkular,” u la bynrap.
U nongïalam jong ka seng RJD u la buh ka jingkyrpad ïa ki briew ba ki la dei ban leit sha Patna ha ka 3 tarik, Lber ban ïashim bynta ha ka ‘Jan Vishwas Maharally’ ha Gandhi Maidan, ha kaba yn sa ïashim bynta da ki heh nongïalam jong ka kynhun synrop ka liang pyrshah ka ‘INDIA’, kynthup u President barim jong ka seng Congress u Rahul Gandhi.
