Shillong, Rymphang 26
Ka India ka la ban pynpaw ïa ka jingtbit ha kaba u Rohit Sharma u la khur san wiket na ka bynta ban pynliem ïa ka England da 5 wiket ha ka jingïalehkai Test kaba saw bad ban pynlong ïa kane ka kynhun ïalehkai ka ri ban khur ïa ka jingjop kaba khathynñiew ha la ïing.
Haba sdang na ki 40/0 hynne ka sngi na ka bynta ban kynjoh sha ki 192, ka India ka la lah ban pynurlong na ka bynta ban khur ïa ka jingjop.
U Rohit Sharma kum u kapten u la lah ban tied 55 run na ki 81 bol bad u Yashasvi Jaiswal u la ïoh 37 run na ki 44 bol. Kine ar ngut ki lah ban ïasnoh kti lang na ka bynta ban kynjoh sha ki 84-run.
Wat la ka la don ka jingshah pynkhyllem ki nongtied ha kaba u Rajat Patidar bad u Ravindra Jadeja ki la shah pynhap wiket kham kloi, hynrei u Shubman Gill (52 not out) bad u Dhruv Jurel (39 not out) ki la lah ban ïai neh haduh kaba kut na ka bynta ban pynlong ïa ka India ban kynjoh sha ka thong. Kine ki ar ar ngut ki nongtied ki la lah ban tied lang da kaba kamai 72-run.
U nongkawang bol ka England u Tom Hartley (1/64) u la lah ban pynkhyllem noh ïa u Rohit, katba u Shoaib Bashir u la long u nongkawang bol ba kynsai ka English ha kaba u la lah ban khur 3 wiket (3/79) ha ka jingïakhun jong ka inning kaba ar na ka bynta ki phra wiket.
Lyngba kane ka jingjop ka India ka la tam da 3-1 ha ka series bad ka dangsah sa shisien ïakhun ka ban long ha Dharamsala naduh 7 tarik u Lber. Kumba ka paw ka India ka la shah rem ha ka jingïalehkai kaba khatduh ha la ïing da 1-2 ha ka England ha ka aïom ïalehkai 2012-13. Naduh katei ka por ka India ka la lah ban khur jingjop haduh 39 sien na ki 50 tylli ki jingïalehkai Test ha la ïing.
Kane ka jingjop ka India ka la long ka jingïai ap khmih lynti ban pynliem ïa ka England naduh u snem 2022 bad ha kajuh ka por ka long ruh ka jinghiar arsut ka England ha ka jingïalehkai Test.
Hadien ka jingthung ïa u Brendon McCullum kum u coach bad u Ben Stokes kum u kapten, ka England ka la don ïa ka thong ban ïalehkai bha pyrshah ïa ka India. Hynrei kane ka kynhun kam shym la lah ban bha bad pynlong ban mad ïa ka jingshah rem.
Ka jingshah rem ha ka jingïalehkai kaba nyngkong ha Hyderabad ka dei na ka daw ba ka India ka la duh noh ïa u khlur ïalehkai u Virat Kohli namar ki daw shimet bad ruh ka jingmynsaw noh u KL Rahul.
Hynrei kane ka kynhun ïalehkai ka ri ka la wanphai da ka jingkhlaiñ bor na ka bynta ban khur jingjop ha ka jingïalehkai Test kaba ar, balai bad ha kane ka kynti kaba mynta.
U Dhruv Jurel uba la lah ban tied 90 bad 39 run ha ka inning kaba nyngkong bad ba-ar, u la ïohpdiang ïa ka nam Player of the Match.
