Mawkyrwat, Rymphang 26
Ka Niaw Wasa FC ka la lah ban pynliem noh da 3-1 kol ïa ka Golden Lion FC ha ka semi final wat ba nyngkong (first Leg) jong ka Mawlangwir Football Invitation Tournament 2023- 24 ha ka lah sngi U Blei ha madan Rowell Lyngdoh Stadium, Saitsnad Mawlangwir SWKHD.
Haba phai sha katei ka jingïalehkai, ka long ka jingïakhun kaba itynnad bad ïakhaid bha namar baroh artylli ki kynhun ki la pyrshang ban ïakhun tyngeh naduh ba sdang ban ïoh ka nam jop.
Ha ka kylla step ka Niaw Wasa ka la ïoh ban pynkhih nyngkong eh ïa ka jar lyngba ka jingbakla u rangïalehkai ka Golden Lion uba la ïoh kum pyndei da ka kti hapoh ka box. Kumta haba la ai penalty, u Teibormi Lyngdoh u la ïoh thep ïa katei ka kol ha ka minit kaba 29 jong ka kylla step.
Ka Golden Lion wat la ka la shah tam shi kol kam shym la duh jingkyrmen bad pyrshang tyngeh ban ïalehkai bha bad dei ha ka minit kaba 38 ba ka Golden Lion ka la ïoh ban pynïakhaid mar shi kol lyngba ka free-kick na u Hikai Bareh.
Haba phai sha ka kylla miet ka jingïalehkai ka la kham itynnad shuh shuh ha kaba baroh ar tylli ki kynhun ki la pyni shisha ïa ki sap ïalehkai kiba itynnad hynrei da ka jingtbit ki rangïalehkai jong ka Niaw Wasa, ha ka minit kaba 59 u Teibormi Lyngdoh u la ïoh ban pynkhih biang ïa ka jar bad bud sa ka kol na u Oviler Pale ha ka minit kaba 86.
Ïa ka nam Man of the Match la khur da u Teibormi Lyngdoh jong ka Niaw Wasa FC uba la ioh ban thep ar kol.
Ka Golden Lion watla ka la shah rem ha ka wat kaba nyngkong ,hynrei ka dang ka don ka lad ïa ka bad ka donkam ban jop ïa ka Niaw Wasa ha ka wat kaba ar ka ban sa long ha ka 13 tarik u Lber 2024.
Na la liang ka Mawlangwir Sports Club ka la pyntip ruh sha ki piadbah riew ïeit phutbol ba ka jingïalehkai semi final kaba nyngkong hapdeng ka Shillong Lajong FC pyrshah ïa ka KMC Sonapur FC kan sa long ha ka 9 tarik mynta u bnai.
