Shillong, Rymphang 26
Ka synjuk ïalehkai jong ka Wrestling Association of Meghalaya ka la sdang ïa ka jingpynkhreh ban jied (selections) ïa ki nongïalehkai kiba kynsai ki ban mihkhmat ïa ka Jylla sha ka lympung ïalehkai 3rd North East Olympic Games 2024.
Ïa kane ka lympung yn pynlong ha Nagaland naduh 18 haduh 23 tarik u Lber mynta u snem.
Ïa kane ka jingpynkhreh la pynlong hapoh ka jaka kilan met jong ka Happy Red Rooster gym ha ka 23 tarik mynta u bnai ha kaba ki nongïalehkai kiba la khur takma ha ka 5th Meghalaya Games ki la wan ïakhun ban pyni ïa la ka jingtbit ha la ki jong ki kyrdan ïalehkai.
Kine ki kyrdan ïalehkai jong ki shynrang ha ka Freestyle Wrestling ki long ka 57kg, 61kg, 65kg, 70kg, 74kg, 79kg, bad ki kynthei ki long ka 50kg, 53kg, 55kg, 57kg, 59kg.
Hadien kane ka jingjied ïa ki nongïalehkai yn sa sdang sa ka jingpynkhreh ai jinghikai (coaching) ha shwa ban leit ïakhun sha ka 3rd National Games 2025 ka ban long ha Nagaland. Ha katei ka jingïakhun la wan shim bynta lang da ki samla na Ri lum Garo ban ïakhun ha kitei ki kyrdan ïalehkai.
Shuh shuh ki bor pynïaid ka Meghalaya State Olympic Association (MSOA) ki la aiti ha ka Wrestling Association of Meghalaya ba kan phah ïa ki nongïalehkai na ka bynta ka Belt Wrestling namar ha ka jingïalang la pynsngew ba ki nongïalam ka WAM ba ki don ki dkhot nongïalehkai jong ki kiba lah ban ïakhun ïa katei ka Belt Wrestling bad ïa kane kin sa nang pynmih ki jingpynbna. Ki kyrdan ïalehkai ha ka Belt Wrestling ki long na ka bynta ki shynrang 60kg, 70kg, 80kg, 90kg, 100kg, 100kg shaneng bad ki kynthei ka long 55kg, 60kg bad 65kg.
Ki nongpynïaid ki dangap ruh ban ïoh jingbthah ha kaba ïadei bad ki jngpynbeit baroh khamtam ki jingkyrshan ha kaba ïadei bad ka mang tyngka na ka Meghalaya State Olympic Association bad khamtam na ka tnad Sports and Youth Affairs jong ka Sorkar Jylla ka jingleit ïashim bynta ki nongïalehkai sha katei ka lympung ka ban sa long ha Nagaland. Kane ka long kat kum ka jingpyllait da u Bah Isaïah Kharmawphlang, President ka WAM.
