Shillong, Rymphang 26
Ka India ka la pynbna ïa khyndai ngut ki nongïakura ki ban ïashim bynta ha ka rynsan ïakura jong ka 1st World Olympic Boxing (Qualifying) ka ban long ha Busto Arsizio, Italy ha u Lber.
Saw ngut ki ‘thei ïakura ki kynthup ïa ka Nikhat Zareen (50kg) kaba la bat ar sien ïa ka nam lahduh ha ka World Championshim, kumjuh ka Preeti (54kg), Parveen Hooda (57kg) lem bad ka ‘thei ïakura kaba la khur ïa ka takma rnong ha Tokyo ka Lovlina Borgohain (75kg) bad kaba la lah ban pynthikna ban ïoh rung sha ka Paris Olympic 2024.
Kine baroh saw ngut ki ‘thei ïakura ki dei kiba la lah ban pynpaw ïa ka jingtbit ha ka Asian Games bad kumjuh ha kiwei ki rynsan ïakura kiba la long shabar ri.
Ka Jaismine Lamboriya ka dei ka nongïakura kaba don ïa ka rynïeng kaba jrong bad kaba ïashim bynta ha ka lightweight (60kg) bad kaba la mihkhmat dangshen ïa ka ri ha ka Asian Games bad ruh ha ka Commonwealth Games. Kane ka ‘thei ïakura kaba dang 23 snem ka rta ka la shah jied biang ban mihkhmat ïa ka India ha katei ka rynsan ïakura ka ban long ha Busto Arsizio.
Ka Arundhati Choudhary kaba la ïakynduh pyrshah ïa ka ‘thei iakura kaba na China ka Yang Liu ha ka preliminary round jong ka Asian Games bad mynta ka kynti ka la shah pynmih bujli noh da ka Ankushita Boro ha ka welterweight (66kg). Ka Boro kaba la kha ha u snem 2000 bad kaba la khur ia ka takma ksiar ha ka Youth World Boxing Championships 2017 kaba la long ha Guwahati.
Haba phai sha ka liang ki shynrang jong ka flyweight (51kg) ki la don ar ngut ki khlur ïakura kata u Deepak Bhoria bad u lahduh ha ka Asian Games u Amit Panghal. U Deepak u la shah jied sa shisien pat ban ïashim bynta ha ka 1st World Olympic Boxing (Qualifying) bad u la khmih lynti ban ïalehkai bha pyrshah ïa ki khlur ïakura kiba na Kazakh, US, Cuban, Colombian, Filipino, English, Spanish, German, Hungarian, Japanese bad kiwei.
U Mohammed Hussamuddin uba la ïasoh lang bad ka kynhun ïalehkai ka ri naduh u 2014 bad naduh katei ka por u la lah ban khur ïa ka takma rnong ha ka World Boxing Championships, Commonwealth Games bad kumjuh ha kiwei ki rynsan ïakura kiba kongsan. Une u rangïakura jong ka featherweight (57kg) u la shah kynthup biang hapoh ka kynhun ïalehkai ka ri bad mynta u la pynmih bujli ha ka jaka u lahduh jong ka Youth World Championship u Sachin.
U Shiva Thapa uba la khur takma bunsien ha ka ASBC Asian Boxing Championships bad mynta une u khlur ïakura uba la 31 snem ka rta u la shah kynthup biang na ka bynta ka kynhun ïalehkai ka ri ha ka light welterweight (63.5kg). Une u rangïakura u la khur takma nongkong eh ha u 2009 bad mynta u la khmih lynti ban ïoh rung sha ka Olympic ha ka sien kaba lai.
U Nishant Dev uba la khur ïa ka takma rnong ha ka World Boxing Championships, u la khmih lynti ban ïalehkai bha ha ka light middleweight (71kg) ka ban long ha Italy. U Lakshya Chahar uba la khur jingjop ha kiba bun ki rynsan ïakura, un mihkhmat ïa ka ri ha ka kyrdan ïakura jong ka light heavyweight (80kg).
U Sanjeet Kumar uba la khur ïa ka takma ksiar ha ka ASBC Asian Elite Boxing Championships 2021 kaba la long ha Dubai, UAE bad uba la ïalehkai hynriew snem ha ka kyrdan ïalehkai heavyweight (92kg). Napdeng kine, u Narender Berwal u la shah jied ban ïashim bynta ha lang ha kane ka rynsan ïakura kaba ban long ha Busto Arsizio.
