Shillong, Rymphang 26
Ka long ka jingsarong ïa ka Jylla hi baroh kawei ba kawei na ki ‘thei ïalehkai, ka Bonifilia Shullai ka la shah kynthup lang hapoh ka kynhun ïalehkai ka ri India na ka bynta ban mihkhmat ha ka SAFF U-16 Women’s Championship.
Ïa kane la pynbna da ka All India Football Federation ha ka lah sngi U Blei ha kaba ka Bonifilia kaba na Lawmali, Shillong ka la don hapoh ka thup jong 23 ngut ki ‘thei ïalehkai U-16.
Dangshen mynta u bnai ka Bonifilia ka la shah kynthup hapoh ka thup jong 30 ngut ki ‘thei ïalehkai bad mynta la lah ban jied sa tang 23 ngut kiba la shah kynthup hapoh ka kynhun ïalehkai na ka bynta katei ka lympung.
Hashwa ban jied ïa ka kynhun ïalehkai kaba khatduh, la pynlong ïa ka prokram ai jinghikai ha Goa. Te kumta kane ka kynhun hapoh ka jingïalam u Biby Thomas Muttath (coach) kan mih ha ka sngi Ba-ar na ka bynta ban leit sha Nepal.
Kane ka long ka sien kaba nyngkong eh ban pynlong ïa ka kyrdan ïalehkai U-16. Kumba ka paw ka India ka la jop ar sien ha ka SAFF U-15 Women’s Championship ha u 2018 bad ha u 2019, hadien ba ka la lah ban pynliem ïa ka Bangladesh ha ki jingïakhun final jong baroh ar ki lympung ïalehkai.
Lah ban pynkynmaw ka Bonifilia ka dei ka ‘thei ïalehkai kaba la ïohpdiang ïa ka nam Most Promising Player ha ka State Level Chief Minister’s Football Tournament kaba la long ha u snem 2019.
Ha u 2022, ka la shah jied ban ïa don bynta ha ka kynhun ki ‘thei ïalehkai U-15 jong ka Bengaluru FC bad ha une ujuh u snem ka la ïalehkai na ka bynta ka Garhwal FC ha ka Football Delhi Women’s Premier League.
Ha kane ka lympung ïalehkai ka India kan ïakhun nyngkong pyrshah ïa ka Bhutan ha ka 1 tarik u Lber, kumjuh ïa ka Bangladesh ha ka 5 tarik bad ïa ka Nepal ha ka 7 tarik.
Ki kyrteng ki 23 ngut ki ‘thei ïalehkai ka India
Goalkeeper: Konjeng -bam Tamphasana Devi, Munni & Surajmuni Kumari.
Defender: Amrita Ghosh, Boni-filia Shullai, Divyani Linda, Eliza-bed Lakra, Gauri, Rheanna Liz Jacob, Rupashree Munda & Sarangthem Alena Devi.
Midfielder: Anita Dungdung, Anushka Kumari, Anwita Raghura-man, H Yashica, Longajam Nira Chanu, Ritu Badaik, Shveta Rani & Thanda Moni Baskey.
Forward: Gurleen Kaur, Gurnaz Kaur, Neha Saji & Pearl Fernandes.
