Washington, Rymphang:
Katkum ki khubor la ong ba uwei u dkhot jong ka tnat shipai liengsuiñ ka US, u la thang im ialade habar jong ka shlem treikam kaba peit ia ki nong Israel kaba don hapoh ka nongbah Washington ha ka Sngi U Blei. Ki lad pathai khubor ki iathuh ba katei ka jingleh jong utei u shipai US ka long ban pyrshah jur halor ka thma jong ka Israel pyrshah ia ka Gaza.
La ong ba ki briew jong ka tnat ‘Emergency’ ki la leit mar-mar sha katei ka jaka tang mar ia ioh jingtip halor katei ka jingjia ha shwa ka por 1:00 baje nohphai sngi. Ki briew ka tnat Emergency ki la ioh jingtip shaphang kane hadien ba la don kiba pyntip ba don ka jingjia thang im ialade hakhmat ka ‘Embassy’ jong ka Israel kaba don hapoh ka nongbah Washington.
Hadien ba ki la leit poi ha katei ka jaka ki lap pynban ba ki briew jong ka tnat ‘Secret Service’ bad ki heh na kiwei ki kynhun, ki la leit poi bad ki la dep pynlip hi ma ki ia katei ka ding kaba la thang bad klang ha ka met jong utei u shipai.
Ia utei u shipai la pynkit noh sha ka jakasumar kaba don ha katei hi ka nongbah bad la ong ba mynta u don hapdeng ka jingma kaba khraw kaba ap ia ka jingim jong u namar katei ka jing-ing ding ha katei ka jingjia.
U nongrah ktien jong ka tnat shipai liengsuiñ ka United States, u la pyntikna ba utei u briew uba thang im ialade u dei u dkhot jong ka tnat shipai liengsuiñ ka US hi hynrei kim shym la ai jingpynshai shuh nalor jong kane.
Na ka liang u nongrah ktien katei ka tnat ba dei khmih ia ki nong Israel hapoh US pat, u la pyntip ba ym shym don ba ngat ne mynsaw ha katei ka jingjia ha katei ka sngi bad la ong ruh ba utei u shipai uba thang im ialade um shym don jingithuh eiei badki.
Ha katei ka jingjia, la ong ba utei u briew u la hylla ia ki kyntien ‘Free Palestine’ bad u la thang ialade bad u la hylla ia kitei ki kyntien haduh ba un da kyllon syndon ha madan.
Ia mynta hi ym pat shym la ioh ia kino kino ki jing pynshisha haba iadei bad katei ka jingjia namar na ka liang ka AFP ruh kam pat lah ban ioh ia ki sabut lyngba ki camera CCTB bad kumta ki pulit bad ka tnat tohkit jong ka US kin hap ban wad jingtip bniah hi dalade haba iadei bad katei ka jingjia namar ym shym la ioh ia ki sakhi kiba biang.
Katei ka jingjia ha kane ka por ka long ruh ha kum kane ka por ba ki jingpyrshah bad jingiakhih ha kylleng ki bynta jong ka United States ki la wan mih na ki paidbah jong ka US hi namar ka jingleit ai jingkyrshan jong ka US ia ka Israel haba iadei bad ka jingleit hiar thma jongka pyrshah ia ki lehnoh Hamas kiba synshar ia ka nongbah Gaza.
Ka tnat ka koit ka khiah jong ka Gaza ka la iathuh ruh ba ka jingdon jong kiba khlad na katei ka thma haduh mynta ka la kot sha 30,000 ngut. Kumta na ka liang ka sorkar Gaza ba la pyniaid da ka lehnoh Hamas, ka la kyntu ia ka US ba kan pynkohnguh ia ka Israel ba ka dei ban sangeh noh ia katei ka thma kaba long ka jingma kaba khraw ia ki paidbah nongshong shnong ka Gaza bad kumjuh ruh ia ki ri ba marjan baroh.
