D. H. Kharkongor
Kane ka jingmaramot ne ka jingpynskhem shuh shuh ne ka jingpynkhlaiñ shuh shuh ïa ka den-um ne ka Main Dam jong ka wah Umïam ka pynbor ïa ki kali heh kiba kit mar kit mata bad kiba da kit khia bha hi ruh, kiba naduh kiba thmu ban wan kiew sha Sor Shillong tad haduh ïa kiba hap ban mih nangne na Sor Shillong, ba kin wad lad noh da kawei pat ka lynti da kaba kin kiar ïa katei ka den-um. Kiba kum kita ki ïapoi ban phaikhmat kyrpang sha ka VIP road. Ka surok kaba pynïasnoh kyrpang ïa ka Umroi Bye-Pass bad ïa ka Sor Shillong da kaba ïaid lyngba ïa ka Umrynjah, ka Mawsiatkhnam, ka Mawtawar bad ïa Mawlai Mawkynroh. Kane nga ngeit ka dei ka daw bah kaba pynlong ba katei ka surok VIP kan tor noh kumne kyndit kyndit.
Kan sa nang tor shuh shuh na kaba ka long mynta lada yn nang ïai bun ki kali heh kiba kit palat liam ki ban ïa lynsher tyngeh ïa ka shimied-shimied. Kan buh jingma ruh de sa ïa ka thie ka jingkieng nar kabahangthie halor jong ka Wah Umïam, ïa kaba ngi ïa tip baroh kum ka jingkieng Umrynjah. Ka jingkieng kaba naduh mynno-mynno bad kaba la ngeit ba kan nym lah ban kyrda ïa ka jingkhia kaba palat ïa ka 9Ton. Ym artatien ba kiwei pat ki ïa kiar kyrpang ym tang ïa katei ka jingkieng Umrynjah hynrei haduh ïa ka jingkhim bad ïa ka jingkyllaiñ than eh jong kato ka surok kaba na syndah hi sbak jong ka kut ne ka kynroh jong ka Shillong Airport. Kiba ym banse ban ïa leit lynsher tyngeh pat de ïa kato kawei pat ka surok kaba na Mawsiatkhnam tad haduh ha ka Umroi bye-pass. Ka surok kaba ïaid lyng ba ïa ka Lum Sohphoh, ka Shyiap bad ïa ka Madan Nonglakhiat. Ha kaba ïadei bad kitei ki surok ba kito ki jingngam, ki jingpdang bad ki jingthliew noh (pot holes) ki jong ruh kin sa nangjur bad kin sa nang heh shuh shuh. Ka jingïai tor ka bansa ktah jur bha ïa baroh ki kali ritbad ym tang ïa kiba leit ki wan hapdeng ka Shillong Airport ne ka kadliengsuiñ kaba ha Umroi bad ka Sor Shillong.
Katai ka surok kaba naduh na Lad Mawmaram jong ka surok bah Shillong-Nongstoiñ tad haduh ha Lad Umsaw jong ka Umsaw – Jorabad Expressway ruh kansa nangïai mad ïa kaba kum katei hi ka juh ka apot ba mad ka VIP Road. Ka long kumta wei ba ki kali heh kiba kit palat pud bad kiba hap ban kiar ïa katei ka den-um jong ka Wah Umïam kin dang ïai lynsher tyngeh ïa ka. Ka lah long leh nohei noh kato ka jingmaramotpynbha ïa ki katto katne ki bynta ki jong ka. Ka jingngam noh, ka jingpdang noh, ka jingthliew noh jong katei ka surok ruh kin sanang jur bad kin sanang heh. Wat ka jingkhoh phler ka jong ki krung ki jong ka ruh kan sa nangjur. Ka jingnang ïai tor jong katei ka surok, kaba ngi ju tip ruh ïa ka kum ka surok Shiliang-Um, kansa ktah jur bha ym tang ïa ki shong kiba katei ka surok ka ïaid lyngba hynrei haduh ïa kiwei kiwei de ki shnong kiba hap ban kdat pat noh na katei ka surok.
ñiuma, ka leit ka wan kaba hapdeng ka Shillong bad ka Umroi-Bhoirymbong kan sa kham suk bad kan sa kham kloi ynda haba la dep pura kane ka surok thymmai kaba naduh na ka Mawlai Bye-pass tad haduh ha Madan Nonglakhiat. Ka surok thymmai kaba da ïaidlait noh ym tang ïa ka jingkhim jong ka surok Mawlai Mawtawar hynrei tad haduh ïa ka jingkyllaiñ than eh bad ïa ka jinglong thiep than eh jong ka Laitlum, kata, da kaba ka ïaid kyrpang noh lyngba ka shnong Umsaw-Mawjynrong bad na ka kyntoit Umjathang. Ka Surok da kaba yn lah ban kiar beit noh ym tang ïa ka den-um jong ka wah Umïam hynrei haduh ïa ka jingkieng Dwar Ksuid. Ngin ïa kyrmen ruh de ba katei ka surok thymmai kan kham ïar ban ia kane ka surok VIP Road kaba kumne mynta.
Nga ngeit ba wat ka New Shillong Township ruh ka donkam da ka surok kaba thymmai ne da ka surok kaba kyrpang na ka bynta ka leit ka wan kaba hapdeng jong ka bad katei ka Shillong Airport ne ka kadliengsuiñ kaba ha Umroi. Ka surok kyrpang kaba ïar, ka ban pynsuk, ka ban pynjan bad ka ban pynkloi syndon hi ruh ïa ka leit ka wan kaba hapdeng jong ka bad katei ka Shillong Airport kaba ha Umroi. Ka surok kaba kyrpang da kaba yn laitnoh ne yn kiar ban ïaid lyngba ïa ka Mawtawar, ïa ka Mawlai Mawkynroh, ïa ka Golf Link, ïa ka Pynthor-Umkhrah ne wat ïa ka Mawpat ne wat ïa ka Nongmensong. Ka surok kaba kyrpang, kaba thymmai, da kaba yn nym donkam hi ruh ban da leit ïaidkyrpangs haduh sha ka Diengpasoh Junction ne shaduh sha ka Eastern Shillong Bye-pass, kata, ban lait ban ïaid kyllaiñ shaduh sha Nongtraw ne shaduh sha ka lad Bhoirymbong bad lad Mynsain ne Khapmara. Ka surok kaba kum ban shu ong noh kaba beit na New Shillong Township tad haduh ha ka Shillong Airport ne kumba her ka sim. Ka surok kaba kane ka Sorkar MDA-II ka dei ban leh kloi noh katba dang khamsuk ka jingiohjaka ne ha shwa ban mih ki jingpynthut ki pynwit kiba har rukom bad kiba jumih ruh kyndit kyndit kumba speh ki tit.
