Shillong, Rymphang 26
Ka Shillong Sports Association (SSA) kan sdang noh ïa ka lympung ïalehkai Shillong Premier League (SPL) 2022-23 ha u Lber mynta u snem hadien ba ka la ïoh la ka jong ka madan ïalehkai bapura ha SSA Stadium, Polo.
Kane ka synjuk ka la khmih lynti ban pynlong hadien ka jingwanphai ka kynhun ïalehkai ka Jylla kaba dang don hapdeng ka jingïakhun jong ka wat kaba khatduh ha ka Santosh Trophy kaba dang ïaid mynta ha Arnachal Pradesh.
Ki kynhun ki ban ïashim bynta ha kane ka lympung ki long ka lahduh jong ka aïom ba la dep, ka Mawlai SC, kumjuh ka Shillong Lajong FC, Rangdajied United FC, Langsning FC, ka Ryntih SC bad ka Nangkiew Irat SC. Katba ki ar tylli ki kynhun kiba la kiew kyrdan sha ka SPL ki long ka Sawmer SC bad ka Nongthymmai SS&CC.
Kumba ka paw ka Sawmer ka dei ka kynhun kaba la wanphai biang sha ka SPL hadien ba ka la lah ban ïalehkai bha ha ka First Division jong ka aïom ïalehkai ba la lah.
Kat kum ki khubor lyngba katei ka synjuk ïalehkai la ong mynta u snem yn pynlong ar sien ïa ka SPL namar kane ka ban sdang ha u Lber ka dei ka aïom ïalehkai 2022-23, katba kawei pat kaba la thmu ban pynlong ha u Risaw kan dei jong ka aïom 2023-24.
Kumta kitei phra tylli ki kynhun ki ban ïakhun mynta ka aïom kin hap ban ïalehkai bha na ka bynta ban ïaknieh ban ïoh rung sha ka Meghalaya State League kaban sa pynlong shen da ka Meghalaya Football Association (MFA).
Lah ban pynkynmaw ba ka jingbym lah ban pynlong ka SSA ban pynlong ïa ka SPL hau snem ba la lah ka dei na ka jingbym don madan ïalehkai namar ka First Ground ka dangdon hapdeng ka jingsiang ïa u phlang plastik bad ka madan ïalehkai jong ka MFA (Third Ground) kam long shuh ban ïalehkai khamtam ha ka por slap namar ka um ka la lang ha ka madan.
