Shillong, Rymphang 27
Ka Shillong Lajong FC kan pynkhreh ïa ka jingïalehkai ha la ïing jong ka lympung ïalehkai I-League pyrshah ïa ka Rajasthan United FC ha ka sngi Balang ha SSA Stadium, Shillong.
Kane ka kynhun ka la khmih lynti ban ïalehkai bha kumba ka la lah ban pynliem ïa ar tylli ki kynhun na ka jylla Manipur; ka Neroca bad ka TRAU. Ka Lajong hapoh ka jingïalam u Bah Bobby L. Nongbet ka la don ha ka kyrdan ba hynriew bad kamai 25 point hadien ba ka la jop hynñiew sien, ïakhaid bad shah rem mar saw sien na ki khatsan sien ïakhun.
Na ka liang u coach Bah Bobby L. Nongbet u la pynpaw ïa ka jingthrang ba ka kynhun kan ïalehkai bha kumba ka la lah ban pynpaw ïa ka jingtbit ha ar tylli ki jingïalehkai ba la dep. “Ngi khmih lynti ba ka kynhun kan khur jingjop pyrshah ïa ka Rajasthan United namar ka kynhun kan ïalehkai ha la ïing hakhmat ki paidbah nongkyrshan. Te kumta ngi khmih lynti ban khur ïa ki lai point.”
Kumba ka paw ka Rajasthan United ka la don ha ka kyrdan ba shiphew ha kaba ka la kamai 16 point hadien ba ka la khur jingjop saw sien, ïakhaid saw sien bad shah rem 7 sien.
Kane ka jingïalehkai kan long ha ka por 7 baje janmiet ha kaba yn pyni lyngba ka channel Euro-sport India, kumjuh ha YouTube Channel jong ka Indian Football bad ka Fancode.
