Shillong, Rymphang 27
U rangïalehkai shapdeng ka Sweden u Kristoffer Olsson u la shah pyndait da u tyndong lyer ban ring pynhiar mynsiem ha ka jaka sumar hadien ba u la kem pang kynsai ha ïingsah lajong.
Ka Midtjylland ka la ong ba utei u rangïalehkai barim ka Arsenal ba dang 28 snem ka rta, u la don jingshitom ha ki bynta jong ka jabieng.
Kane ka klob na Denmark ka la pynbna ba la pynkit ïa u sha ka Aarhus University Hospital ha ka 20 tarik mynta u bnai na ka daw katei ka jingshitom.
Ka Midtjylland ka la ong ba ka la hap ban pyllait ïa kane ka khubor namar ka jingmih ki khubor hamsaïa halor ka jingbym lah ban ïadon lang u Kristoffer Olsson dangshen bad ka kynhun. “Baroh ki phaikhmat sha ka FC Midtjylland halor ka jingshitom kynsan u Kristoffer,” la ong kane ka klob ha ka sngi Ba-ar.
“U Kristoffer Olsson u la ngat ka jingshitom ha ki bynta jong ka jabieng bad kane ka lah ban dei na ka jingtyngkhuh ha ka por ba u ïalehkai bad kaba lah ban buh jingma ïa u.”
“Ka kynhun ka dangïa trei lang bad ka tnat ka koit ka khiah jong ka Denmark na ka bynta ban ai jingsumar kaba paka ïa utei u rangïalehkai.”
Kumba ka paw u Olsson u la san ha ka kam ïalehkai napoh ka shlem ai jinghikai jong ka Arsenal bad u la ïoh ban ïalehkai nyngkong na ka bynta katei ka kynhun ha ka Premier League 2014-15 hashwa ba un leit ïasoh sha ka Midtjylland.
Na ka liang ka Arsenal ha ka kyrwoh lyngba ka X (Twitter) ka la ai khublei kitbok na ka bynta u Kristoffer ba un ïoh ka jingkoit kaba kham kloi.
U Olsson, uba la ïoh ban ïalehkai haduh 47 sien na ka bynta ka Sweden, u la ïoh ban ïalehkai na ka bynta ka kynhun ïalehkai kaba na Sweden ka AIK, ka Krasnodar ha Russia bad ka Anderlecht ha Belgium.
Dangshen u Olsson u la duh ïalehkai na ka bynta ka Midtjylland ha ki ar tylli ki jingïakhun jong ka Danish Superliga bad u la ïalehkai khatduh ha ka jingïakhun pyrshah ïa ka Fredrikstad ha ka Atlantic Cup kaba la long ha 9 tarik mynta u bnai.
“Naduh ba la pynkit ïa u Kristoffer hapoh ka jaka sumar, la ker tawiar da kiba haïing hasem bad ki dkhot ka FC Midtjylland lem bad ki nongsumar,” la bynrap katei ka klob.
