Shillong, Rymphang 27
U Myntri ka tnat Sports & Youth Affair jong ka Sorkar Jylla u Bah Shakliar Warjri u la pynpaw ha ka Dorbar Mang Tyngka ba la mang haduh ` 5.50 klur tyngka na ka bynta ka skhim Chief Minister Youth Development Fund (CMYDF) jong u snem 2023-24. Ka East Khasi Hills bad ka West Garo Hills ki la ïoh kham bun ban ïa kiwei ki district jong ka Jylla.
Haba jubab halor ka jingkylli ba la wanrah da u MLA ka Mawhati Constituency u Bah Charles Marngar ha ka kynta kylli jingkylli hapoh Ïingdorbar ha ka Sngi Ba-ar, u Bah Shakliar u la ong ba kane ka jingmang kham bun ka pisa na ka bynta kitei ar tylli ki district ka long kat kum ka jingdon ki klob kiba la dep ban pynrung kyrteng hapoh ki shlem treikam jong ki Deputy Commissioner.
Ha kaba nyngkong u Bah Charles u la buh jingkylli haduh katno la mang pisa na ka bynta kawei pa kawei ka district, u Bah Shakliar u la pynpaw ba la mang mar T. 30 lak na ka bynta ka Shillong bad ka Tura, katba kiwei pat ki district ki la ïoh mar T. 17 lak na ka bynta ban pynlong ïa ki prokram bapher bapher jong ki samla.
Mar kumta utei u MLA ka Mawhati Constituency u la buh ka jingkylli ba balei ym lah ban buh lang katjuh namar ka Ri Bhoi District kaba don haduh san tylli ki constituency bad kiwei ki district kiba don tang ar bad lai tylli ki constituency. U Bah Warjri u la ong ba ka East Khasi Hills bad ka West Garo Hills ka dei kiba bun tam ki klob ki la pynrung kyrteng sha ka shlem treikam jong ki DC bad kam shong ha ka jingdon ki constituency.
Shuh shuh u Bah Marngar u la buh ka jingkylli kiei ki prokram kiba heh kiba ka tnat ïalehkai ka ju pynlong pyngba ka skhim CMFDF, u Bah Shakliar u la ïathuh ba ka tnat ka la pynlong ïa kiba bun ki prokram kum ki jingiakop shad, rwai, iakop thoh essay, ïakop kyntip, dro jingdro bad kiwei.
