Shillong, Rymphang 27
Ka kynhun ïalehkai U-16 ka ri India ka la poi ha Kathmandu, Nepal na ka bynta ban pynkhreh ïa ka jingïakhun kaba nyngkong ha ka lympung ïalehkai SAFF U16 Women’s Championship pyrshah ïa ka Bhutan ha ka sngi Thohdieng.
Hashwa ba kane ka kynhun hapoh ka jingïalam u coach ba thymmai u Biby Thomas kan mih ban leit ïashim bynta sha katei ka lympung, ka la ïoh ban kilanmet ha Goa la ïoh ban jied sa tang 23 ngut ki ‘thei ïalehkai napdeng ki 30 ngut kiba la shah jied ha kaba nyngkong.
“Ngi la sdang ïa ka prokram kilanmet naduh 15 tarik u Kyllalyngkot bad ka prokram jied nongïalehkai ka la neh haduh 16 sngi. Ki la don haduh palat 60 ngut ki ‘thei ïalehkai kiba la wan sha ka jingpyrshang, hynrei ha u Rymphang la lah ban pynduna sa tang 30 ngut. Mynta ngi la lah ban sei ïa ka kynhun kaba kynsai kaba don sa tang 23 ngut kaba la don mynta ha Nepal.”
“Kine ki khynnah ki dei kiba la don bynta ha baroh ki lympung ïalehkai Sub-Junior bad Junior Girls National Football Championships na ka bynta ka Tier 1 bad Tier 2 (kiba la long ha Amritsar, Belagavi, Bhubaneswar bad Jodhpur),” u la bynrap.
U Thomas, uba long u assistant coach jong ka kynhun ïalehkai kaba la jop ha ka SAFF U19 Men’s Championship ha u snem ba la lah ha Nepal, u la ong kane ka lympung kam dei tang ban khur jingjop, hynrei ki ‘thei ïalehkai ki la nangkiew ha ka rukom ïalehkai katba nangsan ha ka rta ïalehkai jong ki.
“Kane ka prokram ai jinghikai ka la long kaba seisoh. Te kumta ngi donkam ban pynleit jingmut ha ka jingïalehkai namar kum kine ki lympung ngi donkam ban kyntiew ïa ki.”
