Shillong, Rymphang 27
Ka jingïai ap khmih lynti ka kynhun ki ‘thei ïalehkai ka ri ban khur ïa ka nam lahduh shabar na ki bynta jong ka SAFF, kam shym la urlong hadien ba ka la shah thep kol hashwa ban wai ha ka Kosovo ha ka lympung ïalehkai jong ka Turkish Women’s Cup ha ka sngi Ba-ar ha Gold City Complex kaba ha Alanya, Turkey.
Kane ka jingshah rem ka India ka la wan lyngba ka ‘thei ïalehkai ba kynsai ka Ereleta Memeti na ka bynta ban pynlong ïa ka Kosovo ban khur ïa ki 9 point na ki lai sien ïakhun, katba ka India ka la wan ha ka kyrdan ba-ar hadien ba ka la khur 6 point.
Ka ‘thei ïalehkai ka ri ka Manisha Kalyan ka la ïohpdiang ïa ka nam best midfielder of the tournament lyngba ka jinglah ban ïalehkai bha ka jong ka ha kane ka lympung.
Kumba ka paw kane ka jingïakhun ka dei kaba kham kongsan ïa ka India. Lada ka la lah ban khur ïa ki lai point kan jin da la khur ïa ka nam lahduh. Ka Kosovo kaba la mad ïa ka jingshah rem ha u Naiwieng jong u snem 2022 da 1-3 kol ha ka Slovenia, ka donkam ban shu pynïakhaid namar ka la tam lypa lyngba ka jinglah ban thep kol bun.
Kumba ka paw baroh ar ki kynhun ki la lah ban pynpaw ïa ka jingtbit naduh kaba sdang ha kaba ki la pyrshang ban ïakhun tyngeh, hynrei kim shym la lah ban thep kol. Ka India ka la lah ban khanglad ïa ka Kosovo watla ka la ïoh ïa ki kabu kiba biang.
Ka Soumya Guguloth ka la ïoh ïa ki kabu kiba biang ha ka kylla step bad hadien da ka Pyari Xaxa hynrei kine kim shym la lah ban pynurlong.
