Paris, Rymphang:
U President ka France, u Emmanuel Macron u la plie ia ka jingkhang na ka bynta ki ri ka dewbah Europe ha ka Sngi Nyngkong da kaba u pynbna ba ka France kan phah ia ki shipai sha Ukraine na ka bynta ban ai jingkyrshan ia ka Ukraine ha kane ka sien pynkhreh ban iakhun pyrshah ia ka Russia. Jar la katta, u Macron u la ong ba kane ka rai jong ka France ha kane ka por kam dei kaba la pynkhreh ne thmu lypa namar kiba bun hi ki para marjan ri jong ka Ukraine ki pynkhreh bad thmu ban phah da ki tiar siat bad ki tiar iakhun thma. Hynrei u la ong ba ka France ka hap ban phah da ki shipai namar la iohi ia ka jingduh jong ka Ukraine ia shibun ki shipai iakhun naduh ba sdang ka thma haduh kane ka kynti ba mynta.
La ong ba ki la don kumba 20 ngut ki nongialam jong ka Europe kiba la leit ban shong jingialang ban iakynduh lang hapoh ka nongbah Paris ha katei ka Sngi Nyngkong, bad ki la shim ruh ia katei ka rai kaba eh ban pyni ia u President ka Russia- u Vladimir Putin ba ki ri ka Europe kin long ryngkat bad ka Ukraine lada ka Russia kam sangeh noh ia ka thma. Namar kumba la iohi ruh ba ka Russia ha kine ki khyndiat por ba la leit, ka la pynbna ia ka jingpynkhreh thma kaba jur bad ba kan pynliem noh syndon ia ka Ukraine ha kane ka sien iakhun thma ha kane ka sien.
Hynrei haba ai jingkren ha katei ka sngi, u Macron u la ong ba ia mynta hi ka France kam pat don jingthmu ne jing iamynjur eiei bad ka Ukraine, hynrei ka kloi pat ban shim ia kano- kano ruh ka rai tang ban pyntikna ba ka Ukraine kam dei ban shah rem ha ka Russia.
La ong ruh ba u Macron naduh mynshem taïew u la dep khot ia ki nongialam jong ka Europe sha ka Elysee Palace na ka bynta ban ïadon lang bad ban ia pyrkhat kam halor kumno ban leh eiei ban ai ka jingkyrshan kaba radbah na bynta ka Ukraine bad ban pynmih ia ki jingnoh synñiang bad ki lad jingiarap na ka bynta ka tnat shipai ka Ukraine. Kane ka long ban kyrshan ia katei ka ri khnang kan lah ban iakhun pyrshah ia ki shipai ka Russia ha kane ka sien iakhun thma kaba khatduh.
Kumta, la ong ba kiba bun hi ki nongialam jong baroh ki ri na West, ki la ia mynjur ban ai jingkyrshan ia ka Ukraine da kaba phah la ki shipai bad kumjuh ruh da kaba pynmih pisa lane phah da ki tiar iakhun thma na ka bynta ka tnat shipai jong ka Ukraine ba kan ioh ban pyndonkam ha ka jingiakhun thma pyrshah ia ki shipai ka Russia bad khnang ruh ba ki tiar siat bad tiar ban pyndonkam kin ym lut ne duna noh hapdeng ka jingiakhun thma jong kitei ki 2 ri.
