Shillong, Rymphang 28
Ki ar kol ba la thep da u Richardson Kwaku Denzell bad u Lalchungnunga Chhangte ha shwa ban wai ki la biang pura ïa ka Rajasthan United FC ban ïasam mar shi point pyrshah ïa ka kynhun jong shiphew ngut ki rangïalehkai ka Shillong Lajong FC ha ka lympung ïalehkai I-League.
Ha kane ka jingïakhun kaba la long ha ka sngi Balang ha SSA Stadium, ka Rajasthan ka la ïoh ban pynkhih jar nyngkong ha ka minit kaba 12, hynrei ka Lajong ka la lah ban pynphai kylla lyngba u Kynsaibor ha ka minit kaba 25. Kane ka kynhun hapoh ka jingïalam u Bah Bobby L. Nongbet (coach) ka la pynbud biang ïa ka kol kaba ar lyngba ka penalty ba ka shut da u rangïalehkai shakhmat na Brazil u Douglas Tardin ha ka minit kaba 45+4 na ka bynta ban tam da 2-1 kol ha ka kylla step.
Hadien katto-katne por ba la bteng ïa ka jingïakhun jong ka kylla miet, ka Lajong ka la hap ban ïalehkai sa tang shi-phew ngut ki rangïalehkai na ka daw ba u Allan Camper Lyngdoh Nongbri (49) u la shah sei da ka red card ha u rephri. Dei hangne ba ka Rajasthan ka la lah ban pynphai kylla shi kol lyngba u Ragav Gupta ha ka minit kaba 50.
Hynrei ki rangïalehkai ka Lajong ki la ïakhun tyngeh bad dei ha ka minit kaba 80 ka la ïoh ban thep ïa ka kol kaba lai lyngba uwei pat u rangïalehkai na Brazil u Daniel Goncalves. Hadien san minit ka la Lajong ka la thep biang ïa ka kol kaba saw lyngba u khlur ïalehkai uba la ïohpdiang dangshen ïa ka khusnam Kiang Nangbah, u Phrangki Buam.
Ka jingbym lah ban teh lakam da ki rangïa-lehkai ka Lajong kaba la pynlong ia ka Rajasthan ban pynphai biang sa ar kol lyngba u Richardson Kwaku Denzell (90+4) bad u Lalchungnunga Chhangte (90+6) na ka bynta ban ïasam mar shi point.
Lyngba kane ka jingïakhaid ka la pynlong ïa ka Shillong Lajong ban ïai sah ha ka kyrdan ba hynriew bad kamai 26 point na ki 16 sien ïakhun, katba ka Rajasthan ka la don ha ka kyrdan ba khyndai bad 17 point.
Kumta ka Lajong kanpynkhreh ïa ka jingïakhun ban wan pyrshah ïa ka Churchill Brothers ha ka 4 tarik u Lber ha Goa.
