Shillong, Rymphang 28
Ka jingïaid lynti jong ka kynhun ïalehkai ka Jylla ha ka lympung ïalehkai jong ka Santosh Trophy ka la poi sha kaba kut hadien ba ka la ïakhaid khlem don ba thep kol pyrshah ïa ka Goa ha ka sngi Balang ha Golden Jubilee Stadium kaba ha Itanagar.
Da kane ka jingïa-khaid ka la pynlong ïa ka Meghalaya kaba la wan ha ka kyrdan ba-ar ha u snem ba la dep ban hiar sha ka kyrdan ba-ar na shatrai ryngkat bad 2 point na ki saw sien ïakhun, katba ka Arunachal Pradesh ka la don ha ka kyrdan ba shatrai ha ka Group-A.
Wat la kin don haduh saw tylli ki kynhun ki ban ïoh rung sha ka quarter final na kawei pa kawei ka group, hynrei ka Meghalaya kan ym lah shuh ban ïoh rung wat lada ka jop ïa ka Arunachal Pradesh ha ka jingïalehkai kaba khatduh ha ka 30 tarik.
Kumba ka paw ka Services ka dei ka kynhun kaba la bat ïa ka kyrdan ba hakhlieh na ka Group-A ha kaba ka la ïoh 9 point na ki saw sien ïakhun, katba ka Goa (8 point), Kerala (7 point) bad Assam (6 point)ki la don ha ka kyrdan ba-ar, balai bad basaw. Te kumta kine baroh saw tylli ki kynhun ki la thikna ban ïoh rung sha ka quarter final.
Katba na ka Group-B dei tang ka Manipur kaba la lah ban pynthikna ban rung sha ka quarter final hadien ba ka la ïoh ban lamkhmat da kaba kamai 7 point, katba ka Mizo-ram (4 point), Delhi (4 point), Railways (4 point) bad ka Maharashtra (3 point) ki dangdon hapdeng ka jingïaknieh.
